बेळगाव : तीन महिन्यांच्या गर्भवती पत्नीचा पतीने दोरीने गळा आवळून निर्घृण खून केल्याची घटना रामदुर्ग तालुक्‍यातील तोरनगट्टीत बुधवारी (९) घडली. शैला रवी गर्लहोसूर (वय २८) असे मृत पत्नीचे नाव आहे. खुनानंतर पती रवी गर्लहोसूर (वय ३३) स्वत:हून पोलिसांना शरण गेला.

याबाबत पोलिसांकडून मिळालेली अधिक माहिती अशी, बागलकोट जिल्ह्यातील इळकलमधील इरम्मा जालीहाळ यांची मुलगी शैलाचा विवाह रवीसोबत सहा वर्षांपूर्वी झाला होता. या दाम्पत्याला मुलगा व मुलगी आहे. शैला तीन महिन्यांची गर्भवती होती. सुरवातीची काही वर्षे त्यांचा संसार आनंदात सुरू होता. त्यानंतर रवीने हुंड्यासाठी पत्नीचा शारीरिक व मानसिक छळ चालविला होता. तिने ही बाब आई, वडील व भावाला सांगितली होती. शैलाचा त्रास पाहून माहेरच्यांनी जावयाला यापूर्वी अनेक वेळा पैसे व सोन्याचे दागिने दिले होते. तरीही त्याने छळ सुरुच ठेवला. 

हेही वाचा -  शेतकऱ्यांच्या चेहऱ्यावर हसू: आर्किड, गार्नेशिया, गुलाब फुलांना मिळाला चांगलाच दर -

काही दिवसांपूर्वी शैलाच्या लहान भावाचे लग्न झाले. त्याला जास्त सोने दिले. मलाही तितकेच हवे आहे, असे म्हणत त्याने पत्नीला छळण्यास सुरु केले होते. मुलगी सुखी राहावी म्हणून आई-वडिलांनी पैसे देतो असे सांगून जावयाला काही दिवस थांबण्याची विनंती केली होती. तरीदेखील त्याने चार दिवसांपूर्वी पत्नीवर हल्ला केला. त्यानंतर त्याने पत्नीची समजूत काढली. बुधवारी पहाटे मॉर्निंग वॉकला जाण्याच्या बहाण्याने तो तिला घेऊन घराबाहेर पडला.

काही अंतरावर गेल्यानंतर त्याने पत्नी शैलाचा जोंधळ्याच्या शेतात नेऊन दोरीने गळा आवळून खून केला. त्यानंतर तो कटकोळ पोलिसात शरण गेला. चौघा मित्रांच्या मदतीने रवीने मुलीचा खून केला असून त्याने यापूर्वी अन्य एका महिलेशी विवाह केला आहे, असा आरोप शैलाच्या आई-वडिलांनी केला आहे. मात्र, पोलिसांनी केवळ पतीविरोधात गुन्हा दाखल करुन घेतला आहे. अन्य संशयितांविरोधातही गुन्हा दाखल करुन कारवाई करावी, अशी मागणी होत आहे. कटकोळ पोलिस पुढील तपास करत आहेत.

हेही वाचा - मतदारांना दिलं जातंय आमिष ; तीन दिवसांच्या वेतनासह प्रवास खर्चही -

संपादन - स्नेहल कदम