बेळगाव : जोरदार वळवामुळे हेस्कॉमला पंधरा दिवसांत तिसऱ्यांदा मोठा फटका बसला आहे. मंगळवारी झालेल्या वळवामुळे शहरात २५ खांबांचे नुकसान झाले आहे. नवीन खांब उभारण्यासाठी हेस्कॉमच्या कर्मचाऱ्यांना मोठी कसरत करावी लागत आहे. तसेच १५ दिवसात ११७ वीज खांब तुटून पडले आहेत.

काही दिवसांपूर्वी झालेल्या वळवामुळे शहरासह बेळगाव तालुका आणि खानापूर तालुक्यात ९२ वीज खांब पडले होते. त्यामुळे अनेक भागातील वीजपुरवठा खंडित झाला होता. कर्मचाऱ्यांना हे खांब उभे करण्यासाठी चार ते पाच दिवसांचा कालावधी लागला होता. तसेच यावेळी हेस्कॉमला तीस लाखांहून अधिक रुपयांचे नुकसान सहन करावे लागले होते. त्यानंतर मंगळवारी शहरात झालेल्या जोरदार वळवामुळे अनेक ठिकाणी झाडांच्या फांद्या वीज तारांवर तुटून पडल्याने किल्ला परिसरात ३ , कॅम्प येथे ५ यांसह वडगाव, कॉलेज रोड, नेहरुनगर, बॉक्साईट रोड यांसह विविध ठिकाणी २५ खांब कोसळले. त्यामुळे शहराच्या निम्म्याहून अधिक भागातील वीजपुरवठा रात्री उशिरापर्यंत ठप्पच होता. काही भागातील काम बुधवारी दिवसभर सुरू होते.

सर्वाधिक वीज खांब हेस्कॉम उपविभाग क्रमांक ३ व १ मध्ये पडले आहेत. तर उपविभाग क्रमांक २ मध्ये तीन खांब पडून वीजपुरवठा खंडित झाला होता. हेस्कॉमकडे कर्मचाऱ्यांचा तुटवडा आहे. त्यामुळे अगोदरच कर्मचाऱ्यांवर कामाचा ताण असताना वीज खांब पडल्यामुळे शहरातील वीजपुरवठा सुरळीत करण्यासाठी कर्मचाऱ्यांना दिवस-रात्र काम करावे लागत आहे. हेस्कॉमकडून भूमिगत वीजपुरवठा करण्यासाठी वीज वाहिन्या घातल्या असल्या तरी शहरात आजही वीज तारांचे जाळे आहे. मात्र वीज तारांवर झाडांच्या फांद्या पडत असल्याने खांब पडण्याचे प्रमाण वाढले आहे.