विटा - देवनगर ( ता. खानापूर ) येथे छोट्या टेम्पोला रस्ता देत असताना विटा आगाराची बस उलटली. त्यात दहा ते बारा वर्षांची शालेय ३८ मुले - मुली जखमी झाल्याची घटना आज सकाळी दहाच्या सुमारास घडली. सर्व विद्यार्थ्यांना विटा ग्रामीण रूग्णालयात उपचारासाठी दाखल केले आहे. या घटनेनंतर टेम्पो चालक मात्र पसार झाला. 

विटा आगाराची विटा - वाळूंज बस (एम.एच.१२,सी. एच. ७५८३) घेऊन चालक वाळूजला निघाले होते. या बसमधून भांबर्डे, देवनगरची मुले - मुली वाळूज ( ता. खानापूर ) येथे न्यू इंग्लीश स्कूलमध्ये शाळेला निघाली होती. देवनगरचे रस्त्याचे वळण ओलांडून बस पुढे जात असताना समोरून छोटा टेम्पो आला. त्यास बाजू देत असताना बस रस्त्यावरून घसरली व बाजूली उलटली. त्यात ही सर्व मुले किरकोळ जखमी झाली आहेत. त्यांना तेथील नागरीकांनी तातडीने खासगी वाहने व बसने उपचारासाठी विटा ग्रामीण रूग्णालयात दाखल केले.

दैव बलवत्तर म्हणून मुले वाचली 
बस उलटली त्याठिकाणी तीन फूटावर विहीर आहे. मात्र झाडामुळे बस विहीरीपासून काही अंतरावरच उलटली. अन्यथा मोठा अनर्थ घडला असता.