मंगळवेढा : गेल्या अनेक महिन्यापासून लांबणीवर पडलेल्या शहर व तालुक्यातील राष्ट्रवादीच्या पदाधिकाऱ्यांच्या निवडी जिल्हाध्यक्ष दिपक आबा साळुंके पाटील यांनी जाहीर केल्या पण या निवडीने मंगळवेढ्यातील राष्ट्रवादीत असलेली धुसफूस चव्हाट्यावर आली.

शहर व तालुका राष्ट्रवादीचा बालेकिल्ला असताना पक्षाला अलिकडच्या काळात घरघर लागली.नगरपालिकेत नेते राहुल शहा यांच्यामुळेे आमदार भालके गटाशी युती करत राष्ट्रवादी सत्तेपर्यत आली. तालुक्याच्या ग्रामीण भागात मात्र राष्ट्रवादीला स्थानिक स्वराज्य संस्था व ग्रामपंचायतीमध्ये अपेक्षित यश मिळवता आले नसल्यामुळे तालुका राष्ट्रवादीची भाकरी फिरवण्याची गरज असल्याचे ओरड होवू लागली. त्यामध्ये भाकरी फिरवण्यात आली त्यामध्ये शहराध्यक्ष म्हणून पक्षनेते अजित जगताप यांनी संधी दिली. तर तालुकाध्यक्ष म्हणून सुनिल डोके यांना संधी दिली.

याशिवाय लतीफ तांबोळी, भारत बेदरे, भारत पाटील, काशीनाथ पाटील, पी.बी.पाटील, सोमनाथ माळी यांना जिल्हयाच्या बॉडीत संधी देवून उत्तम प्रकारे जातीय समतोल साधला गेल्याचा दावा केला असला तरी राष्ट्रवादीचे नेते राहूल शहा यांना निवडी दरम्यान विश्वासात घेतले नसल्यामुळे प्रांतीक सदस्यांचा राजीनामा देण्याची तयारी ठेवली यामुळे यात असलेली धुसफूस बाहेर आली. तर पक्षनेते अजित जगताप यांनी पत्रकार परिषद घेवून माझ्या निवडीवरून नाराजी असेल तर या क्षणी राजीनामा देण्याची तयारी असल्याचे बोलून दाखवले.

सध्या निवडणुका नसल्या तरी आगामी काळातील लोकसभा व विधानसभा निवडणूकीचा विचार करता राष्ट्रवादीपासून  दुरावलेला मतदार पुन्हा राष्ट्रवादीकडे आर्कषित करण्याचे आव्हान असले तरी निवडीवरून झालेली धुसफूस शांत न झाल्यास याचे पडसाद लोकसभा व विधानसभा निवडणूकीत दिसण्याची शक्यता आहे.