नगर - जिल्हा मराठा विद्या प्रसारक समाज संस्थेला समाजसेवेची मोठी परंपरा आहे. छत्रपती शाहू महाराज यांच्या देणगीतून या संस्थेची निर्मिती झाली आहे. ग्रामीण भागात प्राथमिक तसेच माध्यमिक शाळा आहेत. हॉटेल मॅनेजमेंट कॉलेज, इंजिनिअरिंग कॉलेज, तसेच इंग्लिश मीडियमच्या शाळाही संस्थेने सुरू केल्या आहेत. या संस्थेच्या लॉ कॉलेजमध्ये शिकलेले विद्यार्थी नामवंत वकील झाले आहेत. काहींची न्यायाधीशपदावर निवड झाली आहे.

या संस्थेने नेहमीच आपल्या पूर्वसूरींचा समाजसेवेचा वारसा चालवला आहे. कोरोना विषाणूमुळे राष्ट्रीय संकट उभे राहिले आहे. त्याचा मुकाबला करण्यासाठी प्रत्येकजण पुढे सरसावला आहे. त्या पार्श्वभूमीवर  जिल्हा मराठा विद्या प्रसारक समाज संस्थाही पुढे आली आहे. त्यांनी ५० लाख रूपये मुख्यमंत्री सहायता निधीला देण्याचे ठरवले आहे.

संस्थेतील कर्मचारी, अधिकारी, शिक्षक, विश्वस्त इतर पदाधिकारी मिळून हा निधी जमा करणार आहेत. यापूर्वीही संस्थेने अनेक संकटाच्या काळात मदत केली आहे.

आमच्या संस्थेला समाजसेवेची मोठी परंपरा आहे. छत्रपती चौथे शिवाजी महाराज यांच्या स्मृत्यर्थ ही संस्था उभी राहिली आहे. त्यांचाच वारसा आम्ही चालवित आहोत. कोरोनाचे संकट मोठे आहे. सर्वांचे जीव वाचवण्यासाठी सरकार आपल्या परीने प्रयत्न करीत आहे. त्यात आमची संस्थाही खारीचा वाटा उचलून ५० लाख रूपयांचा निधी देणार आहे.

- जी.डी. खानदेशे, सचिव, जिल्हा मराठा विद्या प्रसारक समाज संस्था,नगर.