सांगली : सांगली लोकसभा मतदार संघातून निवडणूक लढवू इच्छिणारे डबल महाराष्ट्र केसरी चंद्रहार पाटील यांनी आज वंचित बहुजन आघाडीचे नेते ॲड. प्रकाश आंबेडकर (Prakash Ambedkar) यांची भेट घेतली. पुण्यात एक तास बंद खोलीतील चर्चेनंतर चंद्रहार यांना ‘तयारीत राहा, तुमच्यासारखा उमेदवार चांगली लढत देऊ शकतो. मी तुमच्या पाठीशी राहीन’, अशा शब्दांत आंबेडकरांनी आश्‍वस्त केल्याचे श्री. पाटील यांनी सांगितले.

चंद्रहार पाटील (Chandrahar Patil) यांनी सांगली लोकसभा मतदार संघातून शंभर टक्के लढणार आहे, असे जाहीर केले आहे. त्या पार्श्‍वभूमीवर आंबेडकरांनी आज चर्चेसाठी त्यांना बोलावले होते. दुपारी पुण्यात बैठक झाली. त्यात चंद्रहार पाटील यांची निवडणूक लढण्यामागची भूमिका काय, तयारी काय, मुद्दे काय, याबाबत ॲड. आंबेडकर यांनी जाणून घेतले.

सांगली मतदार संघातून गेल्या निवडणुकीत वंचित बहुजन आघाडीला तीन लाख मते मिळाली होती. तेथे आमचा मतदार आहे. आघाडीची गणिते जमून आली तर यावेळी सांगलीचा खासदार ‘वंचित’चा असेल, असा विश्‍वास त्यांनी व्यक्त केला.

चंद्रहार पाटील म्हणाले, ‘‘मी लोकसभा लढणारच आहे, प्रमुख पक्षांकडून ऑफर आली तर मी विचार करेन, असे ॲड आंबेडकर यांना मी सांगितले. त्यावर त्यांनी वंचित बहुजन आघाडीची सध्या महाविकास आघाडीसोबत चर्चा सुरू आहे. मी सांगलीची जागा प्राधान्याने मागणार आहे. तसा निर्णय झाला तर नक्कीच विचार होईल. तुम्ही चांगले उमेदवार ठराल. तयारीत राहा. मी पाठीशी आहे, अशा शब्दांत पाठिंबा दिला.’’