आजरा - आजरा-चंदगड तालुक्‍याच्या जंगल परिसरात चार हत्तींचा कळप वावरत आहे. त्यामुळे शेतकरी चिंताग्रस्त झाले आहेत. ऊस, मेसकाठी यासह विविध पिकांचे कळप नुकसान करीत आहे. या आठवडाभरात कळपाने उसाचे मोठे नुकसान केले.

पोळगाव (ता. आजरा) येथील जानबा गुडुळकर यांचे एरंडोळ रस्त्यानजीक असलेल्या शेतातील उसाचे हत्तीने काल (ता. १०) मध्यरात्री मोठे नुकसान केले. दोन-तीन गुंठ्यातील ऊस कळपाने फस्त केला. मोडूनही टाकला आहे. यापूर्वीही त्यांच्या उसाचे कळपाने नुकसान केले. दोन हत्ती दिसल्याचे गुडुळकर यांनी सांगितले. यापूर्वी कासारकांडगाव व चितळे परिसरातील उसाचे कळपाने नुकसान केले. भावेवाडी येथील आनंदा भुतुर्ले, प्रकाश राऊत, बाळू राऊत, तानाजी राऊत यांच्या उसाचे नुकसान केले. हा कळप चंदगड व आजरा तालुक्‍यातील १० ते १२ गावांत वावरत आहे. त्याचा बंदोबस्त वन विभागाने करावा, अशी मागणी शेतकऱ्यांतून होत आहे.

‘हत्तीप्रवण भागातील ऊस तोडा’
हत्तीप्रवण भागातील ऊस साखर कारखान्यांनी उचलावा, अशी मागणी भागातील शेतकऱ्यांनी केली आहे. रोज हत्ती या भागात येऊन उसाचे नुकसान करतो. तरीही येथील ऊस उचलला जात नसल्याने शेतकऱ्यांत नाराजी आहे.