कडेगाव (जि.सांगली) : कडेपूर (Kadepur)पाठोपाठ अमरापूर (ता.कडेगाव) (Amarpur) येथे घोरपड या वन्य प्राण्याची शिकार झाल्याची घटना उघडकीस आली आहे. याबाबत कडेगाव वनविभागात गुन्हा दाखल झाला असून संशयित राम दिलीप चव्हाण (रा.मांजर्डे,ता. तासगाव) याला अटक करण्यात आली आहे. संशयितास न्यायालयात हजर केले असता प्रथमवर्ग न्यायदंडाधिकारी यांनी त्याला तीन दिवसांची वनकोठडी सुनावली आहे.

याबाबत कडेगाव-पलूस वन परिक्षेत्र अधिकारी कार्यालयाकडून मिळालेली अधिक माहिती अशी की,अमरापूर येथे शुक्रवारी (ता.22) सदाशिव विष्णू जाधव यांचे राहते घरी घोरपड या वन्य प्राण्याचे कातडे काढून पोटातील अवयव बाजूला काढलेल्या अवस्थेत आढळून आले. याबाबत गुप्त बातमीदारामार्फत कडेगाव-पलूस वन परीक्षेत्र अधिकारी कार्यालयाला माहिती मिळाली होती. त्यानुसार संशयित राम दिलीप चव्हाण याला कडेगाव-पलूस वन परीक्षेत्र अधिकारी कार्यालयाने चौकशीसाठी ताब्यात घेण्यात आले आहे. वन्यजीव (संरक्षण) अधिनियम अन्वये काल वन गुन्हा दाखल केला. तर त्याला आज अटक करुन येथील न्यायालयात हजर केले असता प्रथमवर्ग न्यायदंडाधिकारी यांनी त्याला तीन दिवसांची वनकोठडी सुनावली आहे.

या प्रकरणाची वनविभागाने गंभीर दखल घेतली असुन अधिक तपास सांगली उपवन संरक्षक विजय माने व सहाय्यक वनसंरक्षक (वनीकरण) डॉ. अजित साजणे यांचे मार्गदर्शनाखाली वनपरिक्षेत्र अधिकारी पल्लवी चव्हाण,वनपाल एस. व्ही.साळोखे,वनरक्षक भाग्यश्री कुंभार हे करीत आहेत. कोणताही वन्य प्राणी घरामध्ये, शेतामध्ये , अथवा आपल्या परिसरामध्ये आढळून आल्यास किंवा सापडल्यास त्याबाबतची माहिती तात्काळ वनविभागास 1926 या टोल फ्री क्रमांकावर द्यावी असे आवाहन वनविभागामार्फत करण्यात आले आहे.

कडेगाव वनविभागाचे दुर्लक्ष

कडेगाव तालुक्यात वन्यप्राण्यांच्या शिकारीच्या घटनांत दिवसेंदिवस वाढ होत असल्याचे निदर्शनास येत आहे.तर याबाबत कडेगाव-पलूस वन परीक्षेत्र अधिकारी कार्यालयाचे दुर्लक्ष होत असल्याचे नागरिकांतून बोलले जात आहे.

दुर्मिळ वन्य प्रजातींच्या संरक्षणासाठी केंद्र सरकारने 1972 मध्ये मंजूर केलेल्या कायद्यातील शिक्षेच्या तरतुदी कठोर आहेत. गुन्हा सिद्ध झाला तर कमीत कमी तीन वर्षे व जास्तीतजास्त सात वर्षे कारावासाची तरतूद आहे.

- डॉ.अजित साजणे,सहाय्यक वनसंरक्षक (वनीकरण) सांगली