तासगाव (सांगली) : तासगाव तालुक्‍यातील 39 ग्रामपंचायतींच्या निवडणुकांचे निकाल लागले. सोशल मिडियात चर्चेचा एकच हलकल्लोळ उठला. तो इतका वाढला, की निवडून आलेल्यांनाच समजेना मी नक्की कोणत्या पक्षातून निवडून आलो ? बिनविरोध झालेल्या ग्रामपंचायतीही आमच्याच असे दावे प्रतिदावेही करण्यात येत होते. तालुक्‍यातील ग्रामपंचायतीचे निकाल जाहिर होऊ लागले आणि सुरू झाला प्रचंड आनंदोत्सव.

समाजमाध्यमात त्याला अक्षरशः उधाण आले. आपल्या पक्षाला किती ग्रामपंचायती लागल्या हे सांगण्याची जणू अहमहमिका लागली. तालुक्‍यात दोनच पक्ष एक आबा आणि दुसरा काकांचा. आबांच्या गटाच्या जादा ग्रामपंचायती आल्या का काकांच्या हे सांगण्याची स्पर्धाच लागली होती. 

सुरुवातीला एका गटाच्या ग्रामपंचायती जादा आल्याचे झळकताच मागे राहतील ते कार्यकर्ते कसले. त्यांनीही आमच्या गटाच्या जादा कशा आल्या हे सांगण्यासाठी यादीच दिली. त्यावर कढी म्हणून तशीच दुसरी यादी पसरण्यास सुरुवात झाली. स्पर्धा इतकी टोकाला गेली, की बिनविरोध ग्रामपंचायतीपण आमच्याच आहेत हे त्या यादीत सांगण्यास सुरवात झाली. निवडून येणारे आनंदात आहेत तोपर्यंत ते आमच्या गटाचे आणि पक्षाचे असे जाहीर करण्याची स्पर्धाच दिसली.

हेही वाचा- काही ठिकाणी सत्ताधाऱ्यांनी सत्ता राखली तर काही ठिकाणी सत्तांतर झाले
 

बरं. या पोस्ट इतक्‍या वेगाने पसरवल्या गेल्या की एकाच ग्रुपवर एकावेळी एकच पोस्ट एका मिनिटात पाच सात वेळा टाकली गेली. आली पोस्ट की पाठव पुढे. निवडून आलेल्यांना स्वतः फोन करून सांगावे लागत होते, की "बाबा मी अमुक नेत्याला मानतो. गैरसमज नसावा!' आपण नक्की कोणत्या गटातून निवडून आलो हे सांगण्यासाठी शपथ घायची वेळ ट्रोलर्सनी आणली होती.  

संपादन- अर्चना बनगे

.