सोलापूर : मुर्शिया (स्पेन) आणि सोलापूर स्मार्ट सिटी यांच्यात माहिती व तंत्रज्ञानाचे आदान-प्रदान करण्यास दोन शहरांच्या महापौरांनी संमती दर्शविली. शाश्वत शहरी विकास योजनेअंतर्गत सोलापूर महापालिका आणि मुर्शिया या शहरा दरम्यान 24 मे रोजी सांमजस्य करार झाला होता. त्या अनुषंगाने सोलापूरचे शिष्टमंडळ शाश्वत शहरी विकास योजनेअंतर्गत मुलभूत सुविधा सुकर करण्याबाबत वापरण्यात येणाऱ्या तंत्रज्ञानाचे आदानप्रदान करण्यासाठी यामध्ये प्रदुषण, पाणी पुरवठा, उद्योगवाढीसाठी तंत्रज्ञान यातून आदर्श शहरांची निर्मितीबाबत चर्चा करण्यासाठी गेले आहे.

मुर्शियातील सिटी हॉल येथे महापौर डॉ. जोस बॉलेस्टा यांनी स्वागत केले. महापौर शोभा बनशेट्टी, जिल्हाधिकारी डॉ. राजेंद्र भोसले, महापालिका आयुक्त डॉ. अविनाश ढाकणे, पोलिस आयुक्त महादेव तांबडे, नगरअभियंता संदीप कारंजे उपस्थित होते. महापालिकेचे महापौर व आयुक्त यांच्या वतीने मुर्शिया शहराचे डॉ. बॉलेस्टा यांचेही भारतीय संस्कृती पध्दतीने शाल पांघरून सत्कार करण्यात आला.

स्वागत सभारंभानंतर झालेल्या परिषदेत मुर्शिया व सोलापूर शहराच्या माहितीचे सादरीकरण झाले. मुर्शिया व सोलापूर शहरांचे धोरणाबाबत चर्चा झाली. दोन्ही शहराच्या महापौरांनी माहिती व तंत्रज्ञान यांची आदान-प्रदान करण्याबाबत संमती दर्शविली.