सातारा ः सातारा- पुणे राष्ट्रीय महामार्ग मृत्यूचा सापळा बनला आहे. सहापदरी रस्त्याचे काम गेली कित्येक वर्षे सुरू आहे. ज्या कंपनीला हे काम दिले गेले आहे, त्यांच्या कामाच्या दर्जाबाबत प्रशासनाचे पूर्णपणे दुर्लक्ष आहे किंवा अधिकारी जाणूनबुजून दुर्लक्ष करीत आहेत. त्याची चौकशी करावी, असे निवेदन बिल्डर्स असोसिएशन ऑफ इंडियाच्या सातारा शाखेने मुख्यमंत्री देवेंद्र फडणवीस यांना दिले. 

निवेदनात नमूद केले आहे, की सहापदरीकरणाच्या कामाचा दर्जा चांगला नसल्याने त्याचा त्रास सातारकरांना जीव जाईपर्यंत होत आहे. शेकडो लोकांचे प्राण या दर्जाहीन व गुणवत्ताहीन कामामुळे गेले आहेत. त्यांची कुटुंबे पोरकी झाली आहेत. 12 सप्टेंबरला झालेल्या भीषण अपघातातही सहा लोकांनी प्राण गमावला, तर अनेक गंभीर जखमी झाले आहेत. केवळ रस्त्याच्या दुरवस्थेमुळे हा अपघात घडला. हा सदोष मनुष्यावधाचा गुन्हाच आहे.

सातारा- पंढरपूर रस्त्याचे गेली दोन वर्षे सुरू असलेले काम अजून अपूर्ण आहे. सातारा- कोरेगाव, सातारा- पुसेगाव या रस्त्याच्या कामामुळे वाहनचालक हैराण झाले आहेत. ही कामे त्वरित पूर्ण करण्याचे आदेश संबंधित ठेकेदाराला द्यावेत. सातारा शहरातील अंतर्गत रस्त्यांबरोबरच शहराला जोडणारे राज्य, राष्ट्रीय महामार्ग यांची अत्यंत दयनीय अवस्था झालेली आहे. खड्डेयुक्‍त रस्त्यापासून खड्डेमुक्‍त रस्ते होईपर्यंत पाठपुरावा, अशी मागणी निवेदनाद्वारे केली आहे. 

निवेदन देते वेळी माजी आमदार शिवेंद्रसिंहराजे भोसले, बिल्डर्स असोसिएशनचे अध्यक्ष अशोक शिंदे, सचिव श्रीराज दीक्षित, उपाध्यक्ष अनुप शिंदे, खजिनदार साहिल शेख, माजी राज्याध्यक्ष सुधीर घार्गे, राष्ट्रीय विश्‍वस्त विजय देवी, सचिन देशमुख, सुहास शिंदे, ओंकार शिंदे, संदीप जाधव, संजय खटावकर, हनुमंत वळसे, पदाधिकारी व सदस्य उपस्थित होते. 

दंडेलशाहीने टोलची खंडणी 
महामार्ग म्हणायला लाज वाटावी, अशा रस्त्यावर दंडेलशाहीने खंडणी वसूल करण्याचे काम सुरू आहे. त्याला टोल असे नाव दिले आहे. आता सातारकर नागरिकांच्या सहनशक्‍तीचा अंत झाला आहे. कायम शांतताप्रिय मार्गाने चालणाऱ्या सातारकर नागरिकांचे उग्र आंदोलनात रूपांतर होण्याच्या आत तुम्ही लक्ष घालावे. ही रस्त्याची कामे दिरंगाईने का सुरू आहेत, ते पाहून ती त्वरित पूर्ण करण्यासाठी आदेश द्यावेत, अशी मागणीही मुख्यमंत्र्यांकडे केली आहे.