सांगली : जयसिंगपूर येथे गर्भलिंग निदान (Jaysingpur Pregnancy Test) करून महालिंगपूर (जि. बागलकोट) येथे गर्भपातावेळी महिलेचा मृत्यू झाल्याप्रकरणी बनावट महिला डॉक्टरला पोलिसांनी अटक केल्याचे समजते आहे. कर्नाटक पोलिसांनी (Karnataka Police) केलेल्या तपासात रामानंदनगर (कर्नाटक) येथीलही एका डॉक्टरचे नाव या प्रकरणात उघड झाले आहे.

दुधगाव येथील माहेरवाशीण महिलेचा गर्भपातावेळी महालिंगपूर (Mahalingpur) येथे मृत्यू झाला होता. तेथील डॉक्टरनी मृत्यू प्रमाणपत्र देण्यास नकार दिल्याने सोनाली यांचे नातेवाईक मृतदेह घेऊन सांगलीत आले होते. मृत्यू प्रमाणपत्र मिळविण्यासाठी शहरात फिरत असताना हा प्रकार सांगली पोलिसांच्या (Sangli Police) निदर्शनास आल्यानंतर कारवाई करण्यात आली. यानंतर मृत महिलेचा यांचा भाऊ आणि त्याला मदत करणारा येथील एका बनावट डॉक्टरला महालिंगपूर पोलिसांच्या ताब्यात देण्यात आले आहे.

सांगली शहर पोलिस ठाण्याच्या पथकाने बागलकोट येथे जाऊन तेथील अधिकाऱ्‍यांची भेट घेतली व गुन्हा वर्ग केला. यानंतर महालिंगपूर पोलिसांनी आणखी महिलेला अटक केली आहे. तिच्याकडे कोणताही वैद्यकीय परवाना नसताना तिने सोनाली यांचा गर्भपात केला होता. यावेळी प्रकृती गंभीर बनल्याने त्यांचा मृत्यू झाला होता. दरम्यान, रामानंदनगर (कर्नाटक) येथीलही एका डॉक्टरचा सहभाग असल्याचे तपासात समोर आले आहे.