माजगाव :  पश्‍चिम पन्हाळा तालुक्‍याला व शाहूवाडी तालुक्‍यातील काही गावांना सुजलाम्‌ सुफलाम्‌ करणाऱ्या कासारी मध्यम (गेळवडे) प्रकल्पात 17 मे अखेर 36 टक्के पर्यंत पाणीसाठा शिल्लक असून गतवर्षीच्या तुलनेत हा पाणीसाठा 7 टक्के जादा आहे.

तसेच कासारी पाणलोट क्षेत्रात येणाऱ्या उर्वरित पाच लघु प्रकल्पात सरासरी 18 ते 35 टक्‍क्‍यांपर्यंत पाणीसाठा आहे. सद्या सर्व धरणातील शिल्लक पाणीसाठा पाहता हा पाणीसाठा लाभक्षेत्रासाठी जून अखेर मुबलक प्रमाणात उपलब्ध असल्याची माहिती पाटबंधारे विभागाचे इमारत देखभाल शाखा अभियंता (कोल्हापूर) संभाजी काटे यांनी दिली आहे. 

कासारी पाणलोट क्षेत्रात गेळवडे या प्रमुख मध्यम प्रकल्पासह कुंभवडे, केसरकरवाडी, पोबरे, पडसाळी, व नादांरी हे लघु पाटबंधारे प्रकल्प येतात. गेळवडे हे प्रमुख धरण असून याची पाणी साठवण क्षमता 2.77 टीएमसी आहे. या प्रकल्पाखाली शाहूवाडी तालुक्‍यातील 20 गाव व पन्हाळा तालुक्‍यातील 41 गावांना उपसा सिंचन कोल्हापूर पद्धतीच्या बंधाऱ्या मधून पाणी मिळते. उन्हाळ्यात पाणी अडवण्यासाठी नदीवर जागोजागी सुमारे 14 कोल्हापूर पध्दतीचे बंधारे आहेत. सुमारे 9 हजार 458 हेक्‍टर क्षेत्र सिंचनाखाली आहे. 

इतर प्रकल्पात शिल्लक साठा असा 
(कसांत गतवर्षीचा शिल्लक साठा) : 
पडसाळी लघु पाटबंधारे प्रकल्पात 26 टक्के (17 टक्के), पोबरे 35 टक्के (29), कुंभवडे 27 टक्के (23), केसरकरवाडी 23 टक्के (18), नांदारी 18 टक्के (17), इतका पाणीसाठा शिल्लक आहे. 

कासारी पाणलोट क्षेत्रात येणाऱ्या सर्व धरणात सध्या मुबलक पाणी साठा उपलब्ध आहे. त्यामुळे पावसाळा लांबला तरीही जून अखेर या सर्व धरण पाणलोट लाभक्षेत्रात पाण्याची कमतरता जाणवणार नाही. 
- संभाजी काटे, इमारत शाखा अभियंता, पाटबंधारे विभाग, कोल्हापूर