जोतिबा डोंगर (कोल्हापूर) : दख्खनचा राजा श्री जोतिबा देवाची आज शारदीय नवरात्र उत्सवातील तिसऱ्या दिवशी सकाळी पाच पाकळी सोहन कमळा पुष्पातील महापूजा बांधण्यात आली. ही पूजा समस्त दहा गावकरी आणि पुजारी यांनी बांधली. जोतिबा डोंगरावर नवरात्र उत्सवास पारंपरिक महत्त्व असून याठिकाणी नवरात्र उत्सव दिमाखात साजरा केला जातो. 

हेही वाचा - 25 वर्षांपासुन श्री. अंबाबाई, जोतिबा मंदिराची शिखरे चमकवणार अवलिया -

यंदा कोरोनाच्या संसर्गामुळे हा सण साध्या पद्धतीने साजरा केला जातो आहे. आज सकाळी दहा वाजता मानाचा उंट, घोडा सर्व देव सेवक यांच्या उपस्थिती मध्ये धूपारतीचा सोहळा ढोल, पिपाणी, सनई यांच्या गजरात मूळमाया श्रीयमाई मंदिराकडे गेला. यावेळी देवस्थानचे अधिक्षक महादेव हिंडे श्रीचे पूजारी, ग्रामस्थ उपस्थित होते. सकाळी दहा वाजता हा सोहळा जोतिबा मंदिर ते मुख्य पायरी रस्ता मेन पेठ सेंटर प्लाझा या मार्गावरून गेला. 

हेही वाचा -  कोल्हापुरात कामगार कल्याण मंडळाचे कामकाज आता ऑनलाई -

यावेळी गावातील महिलांनी सडा रांगोळी काढून या सोहळ्याचे स्वागत केले. या सोहळ्यात सहभागी असणाऱ्यांना काही ग्रामस्थांनी सुगंधी दुधाचे वाटप केले. यमाई मंदिरात विविध धार्मिक कार्यक्रम झाल्यानंतर दुपारी बारा वाजता हा सोहळा पुन्हा मुख्य मंदिरात आला. त्यावेळी  प्रवीण डबाणे यांनी तोफेची सलामी दिली. व या सोहळ्याची सांगता झाली. यंदा पश्चिम महाराष्ट्र देवस्थान समितीने मंदिर व परिसरात आधुनिक पद्धतीची विद्यूत रोषणाई केल्यामुळे सर्व परिसर उजळून निघाला आहे. रात्रीच्या वेळी हा नयनरम्य देखावा पाहताना मन प्रसन्न होत असल्याचे गावकरी सांगत आहेत. 

संपादन - स्नेहल कदम