कोल्हापूर- सोशल मीडियावर अफवा पसरविणारे "एप्रिल फुल' कोणीही करू नये. सोशल मीडियाद्वारे एप्रिल फुल म्हणून कोरोना विषाणुबाबत गैरसमज पसरविणाऱ्यांवर किंबहुना संबंधित ग्रुपच्या ऍडमीनवर थेट गुन्हे दाखल केले जाणार आहेत. कोणीही एप्रिल फुल करून कायद्याचा भंग करू नये, अन्यथा कारवाई होणार असा इशारा पोलिस अधीक्षक डॉ.अभिनव देशमुख यांनी दिला आहे. 

सोशल मीडियावर सायबर सेलचा वॉच आहे. एप्रिल फुलच्या नावाखाली अफवा अगर गैरसमज पसरविणाऱ्यांवर नजर ठेवली जाणार आहे. 

एक एप्रिलला खोट्या माहितीने अनेकांची चेष्ठा केली जाते. विनाकारण दुसऱ्याला त्रास दिला जातो. अखेर एप्रिल फूल म्हणून सांगितले जाते. मात्र सध्या देशात संचार बंदी आहे. कोरोना विषाणुमुळे जिल्हयात लॉकडॉऊन आहे. अशा काळात चेष्ठा म्हणून नेटिझन्स्‌ कडून एप्रिलफूलच्या नावाखाली काही चुकीच्या माहिती देण्याचा प्रयत्न होईल. अशांवर ही थेट गुन्हा दाखल केला जाईल, असेही देशमुख यांनी स्पष्ट केले आहे. तसेच असे मॅसेज पसरविणाऱ्यांवर गुन्हा दाखल होईल. तसेच असे मॅसेज आढळल्यास सायबर पोलिस ठाण्याशी संपर्क साधावा, यासाठी 0231 -2665975 किंवा 7218038585 किंवा 100 क्रमांकावर संपर्क साधावा असेही आवाहन पोलिस अधीक्षक डॉ.देशमुख यांनी केले आहे.