हुपरी : ‘‘काश्मीरमधील ३७० कलम रद्द केले. प्रभू श्रीराम मंदिर उभे राहिले. आम्हाला पाहिजे आहे तेच काशी, मथुरामध्येही घडणार आहे. हिंदू राष्ट्र स्थापनेची (Hindu Rashtra) वेळ जवळ आली आहे. तरुणांनी जोश आणि होश कायम ठेवून सज्ज राहावे, असे आवाहन श्रीराम युवा सेनेचे संस्थापक आंध्र प्रदेशातील भाग्यनगरचे आमदार टी. राजासिंह (T. Rajasingh) यांनी येथे केले.

समस्त हिंदू समाजतर्फे येथे हुतात्मा स्मारक मैदानावर आयोजित हिंदू धर्मजागृती सभेत ते बोलत होते. सनातन संस्थेच्या स्वाती खाडे, हिंदू जनजागृती समितीचे राष्ट्रीय प्रवक्ते रमेश शिंदे यांच्यासह उद्योगपती राजेश शेटे, माजी जिल्हा परिषद सदस्य राहुल आवाडे, शिवसेनेचे (ठाकरे) माजी जिल्हाप्रमुख मुरलीधर जाधव, शिवराज नाईक, दिनकरराव ससे, सुनंदा औंधकर, समीर मुदगल, नितीन काकडे, किरण दुसे उपस्थित होते.

आमदार राजासिंह म्हणाले, ‘श्रीराम मंदिर उद्घाटनानिमित्ताने जगाने सनातन धर्माची शक्ती बघितली. हीच संघटित शक्ती कायम ठेवून कार्यरत राहू ’ स्वाती खाडे म्हणाल्या, ‘रामलल्ला मंदिरानिमित्ताने स्टॅलिन, खरगे, आव्हाडसारख्या अनेकांना सनातन संस्कृतीचा पोटशूळ उठला आहे.’ रमेश शिंदे म्हणाले, ‘आठ राज्यांत असणारा लव्ह जिहादविरोधातील कायदा महाराष्ट्रात लागू करावा.’ सभेला हिंदुत्ववादी संघटनांचे कार्यकर्ते, नागरिकांनी गर्दी केली होती.

मंदिरातील पैसा हिंदूंसाठीच वापरा

विरोधकांवर जोरदार हल्ला चढवत आमदार राजासिंह यांनी हिंदू मंदिरातील भाविकांनी दान केलेला सगळा पैसा हिंदू संरक्षणासाठीच खर्च झाला पाहिजे. त्यासाठी महाराष्ट्र सरकारने कायदा करावा, अशी मागणी केली.