कोल्हापूर ः सीपीआर कोरोना रुग्णालयात आज दिवसभर 386 व्यक्तींची कोरोना तपासणी झाली. यात विविध आजारांतील 8 नवीन रुग्ण दाखल झाले. नवे-जुने मिळून 76 रुग्णांवर उपचार सुरू आहेत. तर 90 व्यक्तींचे स्वॅब तपासणीसाठी पाठविलेले आहेत, त्यांच्या अहवालाची प्रतीक्षा आहे. नव्या-जुन्या एकूण सात कोरोनाग्रस्तांवर उपचार सुरू आहेत. त्यापैकी पाच जणांची प्रकृती स्थिर आहे तर दोघांची प्रकृती गंभीर आहे, अशी माहिती वैद्यकीय सूत्रांनी दिली. 
जिल्ह्यातील आजरा, चंदगड येथील तीन कोरोनाबाधितांवर सीपीआर रुग्णालयात उपचार सुरू आहेत. मुंबईत मृत्यू झालेल्या व्यक्तीचा मृतदेह घेऊन तीन व्यक्ती आजऱ्याकडे आल्या होत्या. मृतदेहावर अंत्यसंस्कार झाल्यानंतर त्यांच्यासोबत आलेली 41 वर्षीय महिला व 20 वर्षीय युवक हे दोघे कोरोनाग्रस्त आढळले. त्यांना सीपीआरमध्ये दाखल केले आहे. त्या पाठोपाठ चंदगडमधील एक 55 वर्षीय व्यक्तीही कोरोना पॉझिटिव्ह आली. या तिघांचीही प्रकृती स्थिर आहे. त्यांच्या संपर्कातील अन्य व्यक्तींना ग्रामीण रुग्णालयाकडे तपासणीसाठी पाठविले आहे. त्यापैकी काहींचे स्वॅब घेतले आहेत; मात्र अहवाल आलेला नाही, अशी माहिती वैद्यकीय सूत्रांनी दिली.