बेळगाव : दहावीची परीक्षा जाहीर केलेल्या वेळापत्रकाप्रमाणे होण्याचा मार्ग मोकळा झाला असून परीक्षा रद्द करण्याबाबत न्यायालयात दाखल झालेली याचिका फेटाळण्यात आली आहे. मात्र दहावीची परीक्षा घेताना विद्यार्थ्यांच्या सुरक्षेची अधिक काळजी घ्या, अशी सूचना न्यायालयाने शिक्षण खात्याला केली आहे. 

शिक्षण खात्याने 25 जून ते 4 जुलै दरम्यान दहावीची परीक्षा घेण्याचा निर्णय घेतल्यानंतर अॅड. लोकेश कुमार यांनी न्यायालयात जनहित याचिका दाखल केली होती. याबाबत बुधवारी न्यायालयात सुनावणी झाली.

 यावेळी न्यायालयाने परीक्षा घेताना विधार्थ्यांच्या सुरक्षेची काळजी घ्या, तसेच परीक्षा केंद्रावर आवश्यक त्या उपाय योजना कराव्यात, अशी सूचना केली आहे. 

हे पण वाचा - मार्ग मोकळा ः नोकरीसाठी गोव्यात जाणाऱ्यांना ई-पास मिळणार

शिक्षण खात्याने दहावी परीक्षेचे वेळापत्रक जाहीर करीत परीक्षेची तयारी सुरू केली आहे.  मात्र दहावी परीक्षा रद्द करावी अशी जनहित याचिका उच्च न्यायालयात दाखल करण्यात आल्यापासून शिक्षण खात्याचे लक्ष सुनावणीकडे लागून राहिले होते. 

लोकेश कुमार यांनी न्यायालयात जनहित याचिका दाखल करीत राज्यात दिवसेंदिवस कोरोनाचे रुग्ण वाढत आहेत. त्यामुळे परीक्षा काळात मुलांनाही त्याचा संसर्ग होण्याचा धोका आहे. त्यामुळे अशा परिस्थितीत परीक्षा घेणे योग्य नाही. त्यामुळे परीक्षा रद्द करावी तसेच सर्व विद्यार्थ्यांना पास करावे अशी मागणी याचिकेद्वारे केली होती. मात्र न्यायालयाने सुनावणीवेळी शिक्षण खात्याला दिलासा दिला आहे.