गडहिंग्लज : कोल्हापूर जिल्ह्यामध्ये गेल्या सहा वर्षांपासून पर्यावरणपूरक गणेशोत्सव राबविला जात आहे. ही लोकचळवळ अविरत सुरु ठेवण्यासाठी जिल्हा परिषदेच्या पदाधिकाऱ्यांना साद घातली आहे. आपल्या मतदारसंघातील गावामध्ये पर्यावरणपूरक गणेशोत्सव साजरा करुन प्रदुर्षनमुक्तीच्या प्रयत्नांना हातभार लावावा, असे आवाहन करण्यात आले आहे. पाणी पुरवठा व स्वच्छता मिशनतर्फे जिल्हा परिषदेच्या पदाधिकाऱ्यांना पत्र देण्यात आले आहे.

कोल्हापूर जिल्ह्यात २०१५ पासून पर्यावरणपूरक गणेशोत्सव साजरा केला जातो. यंदाचा उत्सवही पर्यावरणपूरक साजरा करण्यासाठी आपापल्या मतदारसंघातील गावात जनजागृती करावी. घरगुती व सार्वजनिक ठिकाणी पर्यावरणपूरक गणेशमूर्तीची प्रतिष्ठापना करावी, गणेशमूर्तीचे पर्यायी व्यवस्थेत विसर्जन करणे, निर्माल्य संकलन करण्याबाबत जनजागृती करावी.

पर्यावरणपूरक किंवा शाडूच्या मूर्तीची प्रतिष्ठापना करावी, गणेशमूर्ती विसर्जनासाठी कृत्रिम तलाव, पर्यायी व्यवस्थेची निर्मिती करावी. यातून प्रदुर्षणमूक्तीचा हेतू साध्य करण्यात यशस्वी होऊया असे आवाहन पत्रातून केले आहे. जिल्हा परिषदेचे अध्यक्ष राहूल पाटील, मुख्य कार्यकारी अधिकारी संजयसिंह चव्हाण यांच्या पत्रावर सह्या आहेत.