कोल्हापूर - पगाराचे पैसे कधी देणार म्हणून जाब विचारणाऱ्या खासगी उमेदवाराला (Private Candidate) लिपिकाने (Clark) शिवीगाळ केली. त्यानंतर शिवी का देतोस? म्हणून लिपिक आणि खासगी उमेदवार यांच्यामध्ये फ्रिस्टाई हाणामारी (Fighting) झाली. त्यानंतर त्या उमेदवाराने लिपिकाच्या डोक्‍यात थेट खुर्ची घातली. त्यामुळे लिपिकाच्या डोक्‍याला दोन ते तीन टाके पडले आहेत. वास्तविक ज्याला मारहाण (Beating) झाली त्या लिपिकानेचे खासगी उमेदवाराला काम दिले होते, आज त्याच उमेदवाराने आपल्या "गुरू'ला "प्रसाद'दिल्याने जिल्हाधिकारी कार्यालयातील नगरप्रशासन विभागात खळबळ उडाली.

जिल्हाधिकाऱ्यांच्या दालनापासून काही अंतरावर असणाऱ्या नगरप्रशासना विभागामध्ये दुपारी दिडच्या सुमारास जिल्हाधिकारी कार्यालयात काम करणार खासगी उमेदवार आला. त्याने तिथे असणाऱ्या लिपिकाला आपला 8 हजार रुपये पगार अद्याप का दिलेला नाही, असा सवाल केला. त्यानंतर दोघांमध्ये जोरदार शाब्दिक चकमक झाली.

चकमकीत त्या लिपिकाने उमेदवारला शिवीगाळ करण्यास सुरुवात केली. शिव्या का देतोस म्हणून दोघांमध्ये जोरदार झटापट सुरु झाली. नगरप्रशासनामध्ये असणाऱ्या इतर कर्मचाऱ्यांची तारांबळ उडाली. याठिकाणी महिलाही काम करतात, त्यांचीही भितीने गाळण झाली. शेवटी हाणामारी करणाऱ्या लिपिक आणि उमेदवाराला तेथील कर्मचाऱ्यांनी अडवून एकमेकांपासून दूर लोटले.

उमेदवाराने केलेल्या मारहाणीत जखमी झालेला लिपिकाला दोन ते तीन टाके पडल्याचे समजते. तो रक्तबंबाळ होवूनच दवाखाण्यात गेला. दवाखान्यातून तो पुन्हा जिल्हाधिकारी कार्यालयात आला होता. पण प्रसार माध्यमाचे लोक याबद्दल विचारणा करत असल्याचे समजता त्याने तेथून काढता पाय घेतला.