कोल्हापूर - महापालिकेच्या वतीने राजर्षी छत्रपती शाहू महाराज यांचे समाधी स्मारक साकारले आहे. स्मारकाच्या उर्वरित कामासाठी सुमारे पाच कोटींची आवश्‍यकता आहे. त्यासाठीचा प्रस्ताव पालिका प्रशासनाने २९ जानेवारीला समाजकल्याण विभागाला पाठविला आहे. पालकमंत्री सतेज पाटील यांनी हा प्रस्ताव शासनाला सादर करण्याचे आदेश समाज कल्याण विभागाचे सहायक आयुक्त बाळासाहेब कामत यांना दिले. विशेष साहाय्य निधींतर्गत समाधी स्मारकासाठी महापालिकेला निधी मिळणार आहे.

पाच कोटींचा निधी आवश्‍यक

सिद्धार्थनगरजवळील नर्सरी बागेत राजर्षी शाहू यांचे समाधी स्मारक उभारले आहे. त्यासाठी महापालिका निधीतून सुमारे तीन कोटी खर्च केला आहे. मात्र मूळ स्मारकाचे काम पूर्ण झाले असले तरी उर्वरित कामे आहेत. त्यासाठी सुमारे पाच कोटींचा निधी आवश्‍यक आहे. जिल्हा नियोजन समितीच्या बैठकीत पालकमंत्री पाटील यांनी उर्वरित निधीसाठी पालिका प्रशासनाने प्रस्ताव सादर करावा, असे आदेश दिले होते. त्यानुसार महापालिकेच्या वतीने समाजकल्याण विभागाला प्रस्ताव सादर केला.

वाचा - मंत्र्यांच्या घरासमोर आत्मदहन करणार

समाधी स्मारक प्रकल्प आराखड्यानुसार पाच कोटी ८ लाख ५५ हजार रुपये खर्च अपेक्षित आहे. सामाजिक न्याय व विशेष साहाय्य विभागाने निधी द्यावा. निधीतून डॉ. बाबासाहेब आंबेडकर सभागृह नूतनीकरण करणे, त्यात राजर्षी छत्रपती शाहू महाराज यांच्या जीवनावर आधारित कलादालनाची निर्मिती करणे, वाहनतळाबरोबरच इतरही कामे करण्यात येणार आहेत. संबंधित काम पूर्ण झाल्यानंतर जागेचा मालकी हक्क हा महापालिका ताब्यात असल्याने स्मारक परिसराची देखभाल-दुरुस्ती पालिका करण्यास तयार आहे, असे प्रस्तावात म्हटले आहे.

दृष्टिक्षेपात 

•  आराखड्यानुसार पाच कोटी ८ लाख खर्च अपेक्षित 
• डॉ. बाबासाहेब आंबेडकर सभागृह नूतनीकरण 
• राजर्षी छत्रपती शाहू महाराजांच्या जीवनावर आधारित कलादालन
• वाहनतळाबरोबरच इतरही कामे होणार