Kolhapur News : लोकसभा निवडणुकीत राज्यभर महाविकास आघाडीला मिळालेले यश पाहता, कोल्हापूर जिल्ह्यात विधानसभेच्या उमेदवारीवरून महायुतीत प्रचंड अस्वस्थता आहे, तर महाविकास आघाडीत इच्छुकांची भाऊगर्दी होण्याची शक्यता आहे. अशा परिस्थितीत उमेदवारी देताना दोन्ही आघाड्यांत नेत्यांचा कस लागणार आहे.

लोकसभेप्रमाणेच विधानसभेला महायुती व महाविकास आघाडीच एकत्रित लढण्याची शक्यता आहे. कोल्हापूर लोकसभा मतदार संघातून काँग्रेसचे श्रीमंत शाहू छत्रपती महाराज यांच्या विजयाने काँग्रेसची बाजू मजबूत झाली आहे.

परिणामी या लोकसभा मतदार संघातील सर्वच मतदार संघांत आता महाविकासच्या उमेदवारी मिळवण्यासाठी इच्छुकांनी शड्डू ठोकण्यास सुरुवात केली आहे. एक-दोन मतदार संघांचा अपवाद वगळता महायुतीतही काही मतदार संघात इच्छुकांची संख्या अधिक असल्याने बंडखोरी रोखण्याचे आव्हान नेत्यांसमोर असेल.

सद्य:स्थितीत जिल्ह्यातील दहापैकी चार मतदार संघांत काँग्रेसचे, दोन मतदार संघांत राष्ट्रवादी अजित पवार गटाचे, एका मतदार संघात शिवसेना शिंदे गटाचे, तर इचलकरंजी, शिरोळ व पन्हाळा-शाहूवाडीत अपक्ष आमदार आहेत.

अपक्षांपैकी शिरोळचे राजेंद्र पाटील-यड्रावकर, प्रकाश आवाडे आणि ‘जनसुराज्य’चे डॉ. विनय कोरे हे सद्य:स्थितीत महायुतीसोबत आहेत. जागा वाटपात या जागा संबंधितांनाच सोडल्या, तर या मतदार संघातील महायुतीतील अन्य इच्छुकांची कोंडी शक्य आहे.

अशीच स्थिती महाविकास आघाडीची आहे. हातकणंगले, इचलकरंजी, चंदगड, राधानगरी-भुदरगडमध्ये आघाडीकडे इच्छुक जास्त आहेत, त्याठिकाणी उमेदवारी देताना ‘इलेक्टीव्ह मेरीट’चा विचार करताना, नेत्यांची दमछाक होणार आहे.

आघाडीत कोल्हापूर उत्तर, दक्षिण, करवीर व हातकणंगलेत विद्यमान आमदार काँग्रेसचे असल्याने या जागा त्यांना सोडल्या तर उत्तर, दक्षिण व करवीरमध्ये फारशी बंडखोरी होण्याची शक्यता नाही. पण, हातकणंगलेत शिवसेना ठाकरे गटाचे माजी आमदार डॉ. सुजित मिणचेकर, राष्ट्रवादी शरद पवार गटाचे माजी आमदार राजीव आवळे यांची भूमिका निर्णायक असेल.

एखाद्याला थांबवायचे म्हटल्यास राजकीय आयुष्यातील पाच वर्षे त्यांची वाया जाणार आहेत. मग अशांकडून पर्यायांचा विचार होऊ शकतो. महायुतीतही राधानगरी, चंदगड, कोल्हापूर उत्तर, शिरोळ, कागलमध्येही उमेदवारीवरून रस्सीखेच होण्याची शक्यता आहे.

विद्यमान आमदारांनाच संधी द्यायची झाल्यास इचलकरंजी, राधानगरी, कागल, चंदगड, उत्तर, शिरोळमध्ये महायुतीत बंडखोरीची शक्यता अधिक आहे. शाहूवाडीत डॉ. कोरे आणि त्यांच्या विरोधात पारंपरिक विरोधक म्हणून माजी आमदार सत्यजित पाटील-सरूडकर ही लढत वगळता अन्य मतदार संघात उमेदवार ठरवताना जिल्हा आणि राज्य पातळीवरील पक्ष नेतृत्वाची कसोटी लागणार, हे नक्की आहे.