इचलकरंजी (कोल्हापूर) : महाराष्ट्र पोलिस दलातील कॉन्स्टेबलाच्या घरावरच छापा टाकून राज्य उत्पादन शुल्क इचलकरंजी विभागाने गोवा बनावटीची विदेशी दारू जप्त केली. या प्रकरणी पोलिस कॉन्स्टेबल aयमनाप्पा आण्णासो वडर (वय ३३), युवराज नागाप्पा वडर (दोघे समतानगर शिरोळ), ऋषिकेश कृष्णा पाटील (रा. शिरोळ), विक्रम बाळासो गवळी (शिरटी), तानाजी मोहन थोरवत (घालवाड) या पाच जणांवर गुन्हा नोंद केला.  

या कारवाईत उत्पादन शुल्कने दारूचे १४ बॉक्‍स ताब्यात घेतले असून एकूण १ लाख ८ हजार ४८० रुपये किमतीचा मुद्देमाल जप्त केला. पोलिसाच्या घरावर छापा टाकून उत्पादन शुल्कने दारू जप्त केल्याची चर्चा चांगलीच रंगली होती.

हेही वाचा - प्रियकराने प्रेमच असे केले की, शेवटी नशीबी त्याच्या कोयत्याचे वार आले -

मिळालेली माहिती अशी, शिरोळ येथील समतानगर परिसरात बेकायदेशीरपणे गोवा बनावटीची विदेशी दारू विक्री सुरू असल्याची माहिती उत्पादन शुल्कला मिळाल्यानंतर पथकाने छापा टाकला. कारवाईत १४ खाकी कागदी खोक्‍यांच्या बॉक्‍समधील गोवा बनावटीची दारू आढळली. यामध्ये विविध ब्रॅंडचे १६ बॉक्‍स जप्त केले. कारवाईत एकूण १ लाख ८ हजार ४८० रुपयांचा मुद्देमाल उत्पादन शुल्कने ताब्यात घेतला.

कारवाईतील कॉन्स्टेबलसह अन्य चारही आरोपींवर महाराष्ट्र दारूबंदी कायद्यांतर्गत विविध चार कलमाखाली गुन्हा नोंद केला. ही कारवाई राज्य उत्पादन शुल्क इचलकरंजी विभागाचे निरीक्षक पी. आर. पाटील यांच्या पथकाने केली. या पथकात दुय्यम निरिक्षक श्रीमती वर्षा पाटील, सहाय्यक दुय्यम निरीक्षक राहुल गुरव, जी. एच. हजारे, सुभाष कोले, विलास पवार, प्रसन्नजीत कांबळे यांचा सहभाग होता.

संशयित कॉन्स्टेबल मिरजेत कार्यरत

संशयित आरोपी पोलिस कॉन्स्टेबल यमनाप्पा वडर गोवा राज्यातून शासनाचा महसूल बुडवून शिरोळ येथील राहत्या घरात बेकायदेशीरपणे दारू विक्री करत होते. अन्य चौघांच्या संगनमताने ही दारू विक्री शिरोळ परिसरात राजरोसपणे सुरूच होती. कारवाईतील मुख्य आरोपी यमनाप्पा वडर महाराष्ट्र पोलिस सेवेत कार्यरत असून मिरज शहर पोलिस विभागात सेवा बजावत आहेत.

हेही वाचा -  लय भारी! कोल्हापुरकराचा हातगाडी ते मर्सडीज बेंझ असा प्रेरणादायी प्रवास 

संपादन - स्नेहल कदम