कागल : ‘गेल्या अनेक वर्षांपासूनची देशवासीयांची भावना असलेले अयोध्येतील श्रीराम मंदिर (Ayodhya Ram Mandir) साकारले आहे. २२ जानेवारी रोजी अयोध्येमध्ये प्राणप्रतिष्ठापना व मंदिर लोकार्पण सोहळा साजरा होत आहे. याच दिवशी येथील गैबी चौकात भव्यदिव्य कार्यक्रमाचे आयोजन केले आहे. या कार्यक्रमास नागरिकांनी मोठ्या संख्येने उपस्थित रहावे’, असे आवाहन पालकमंत्री हसन मुश्रीफ (Hasan Mushrif) यांनी केले.

मतदारसंघातील ज्येष्ठ नागरिकांना अयोध्या दर्शन घडविणार असल्याचेही त्यांनी सांगितले. अयोध्या येथील श्री राम मंदिराचा लोकार्पण सोहळा व मूर्ती प्रतिष्ठापना २२ जानेवारी रोजी होत आहे. या आनंदोत्सवानिमित्त मुश्रीफ फाउंडेशनच्या वतीने एक लाख कुटुंबांमध्ये आनंदोत्सवाचा प्रसाद वाटप प्रारंभ पालकमंत्री हसन मुश्रीफ यांच्या हस्ते येथील श्री राम मंदिरात (Ram Mandir Kagal) झाला. यावेळी ते बोलत होते.

मुश्रीफ म्हणाले, ‘देशातील सर्वधर्मियांची धार्मिकस्थळे चांगली करण्याचा प्रयत्न केंद्र शासन व पंतप्रधान नरेंद्र मोदी यांचा आहे. कागल येथील श्रीराम मंदिर बांधण्यामध्ये माझे मोठे योगदान आहे. २२ जानेवारी रोजी देशातील १४० कोटी जनता हा सोहळा साजरा करणार आहे. याच दिवशी कागलमध्ये गैबी चौकात भव्यदिव्य कार्यक्रम घेणार आहोत. टाळ मृदंगाच्या गजरात व भव्य आतिषबाजीने हा सोहळा साजरा करणार आहोत. ’