कोल्हापूर - दागिन्यांसाठी वृद्ध महिलेचा भिंतीवर डोके अपटून खून केला. अंगावरील दागिने काढून घेऊन मृतदेह पोत्यात बांधला. त्यानंतर तो मोपेडवरून राजाराम तलाव परिसरात फेकून दिला. काही वेळानंतर पुन्हा तेथे जावून मृतदेहाची खात्री संशयित संतोष परीटने केल्याची माहिती तपासात पुढे येत आहे. फायनान्स कंपनीत ठेवलेले सोने जप्त करण्याची प्रक्रियाही पोलिसांनी सुरू असल्याचे पोलिस निरीक्षक सीताराम डुबल यांनी सांगितले. 

राजाराम तलाव परिसरात 10 फेब्रुवारीला सकाळी महिलेचा अर्धवट मृतदेह सापडला. पोलिसांनी त्या मृतदेहाची ओळख पटवली. हा मृतदेह पाचगावातील शांताबाई आगळे यांचा असल्याचे स्पष्ट झाले. त्यांच्या खून केल्याप्रकरणी संशयित संतोष परीटला अटक केली. सध्या तो पोलिस कोठडीत आहे. त्याने आगळे यांना देवकार्याचे कारण सांगून 5 फेब्रुवारीला घरी घेऊन आला. त्यानंतर त्याने त्यांना आपल्या खोलीत नेले. तेथे भिंतीवर त्यांचे डोके आपटले त्यानंतर त्या डोक्‍यावर पाठीमागे पडल्या. त्यातच त्यांचा मृत्यू झाला. यानंतर त्यांच्या अंगावरील सोन्याचे दागिने त्याने काढून घेतले. मृतदेह वाकवून पोत्यात भरला. ते पोते मोपेडवरून राजाराम तलाव परिसरात फेकून दिले. त्यानंतर त्याने काहीवेळाने पुन्हा तेथे जावून मृतदेहाची खात्री केली. भरदिवसा सुमारे अवघ्या अर्धा पाऊण तासात हे कृत्य केल्याची माहिती चौकशीतून पुढे आली आहे. 

हे पण वाचा - अंगावर शहारे आणणारी घटना; भरदिवसा अवघ्या अडीच तासांत वृद्धेचा केला गेम

सोने जप्त करण्याची प्रक्रिया सुरू... 
संशयिताने आगळे यांचे दागिने दोन फायनान्स कंपनीत तारण ठेऊन तेथून सुमारे दोन लाखांचे कर्ज घेतले असल्याची माहिती पुढे आली आहे. हे सोने जप्त करण्याची प्रक्रिया सुरू असून लवकरच ते सोने जप्त करण्यात येणार असल्याचे डुबल यांनी सांगितले. 

सीसी टीव्ही फुटेज ताब्यात घेणार... 
संशयित परीटच्या माळी कॉलनीतील घरात आगळे त्या दिवशी गेल्या. त्यानंतर काही वेळाने फक्त परीट तेथून मोपेडवरून निघून गेला हा प्रकार परिसरातील सीसी टीव्हीत कैद झाला आहे का? त्याची माहिती घेऊन ते ताब्यात घेण्याचे काम पोलिस करीत आहेत. 

संपादन - धनाजी सुर्वे