सिद्धनेर्ली : ‘येणाऱ्या सर्व निवडणुकांत एकत्र राहून काम करणार आहोत, अशी शपथ मी व संजय घाटगे (Sanjay Ghatge) यांनी घेतली आहे. आमच्या मैत्रीला कोणाची दृष्ट लागू नये,’ असे प्रतिपादन वैद्यकीय शिक्षण व विशेष सहाय्य मंत्री तथा पालकमंत्री हसन मुश्रीफ (Hasan Mushrif) यांनी केले. वंदूर (ता. कागल) येथे विविध विकासकामांच्या लोकार्पण व उद्‍घाटनप्रसंगी ते बोलत होते. यानिमित्ताने मुश्रीफ व घाटगे यांनी एकमेकांवर स्तुतिसुमने उधळली.

मुश्रीफ म्हणाले, ‘संजय व मी कॉलेज जीवनात जीवलग मित्र होतो. मात्र, राजकीय परिस्थितीमुळे तीस वर्षे एकमेकांच्या विरोधात लढलो. त्यानंतर एका विशिष्ट वळणावर एकत्र आलो. सर्वसामान्य जनता, शेतकरी, तरुण यांच्या आयुष्यात समृद्धी आणणे, हेच आमचे ध्येय आहे. यासाठी दोघेही एकमेकांच्या हातात हात घालून काम करणार आहोत.’

संजय घाटगे म्हणाले, ‘मंत्री मुश्रीफ सकाळी साडेपाचपासून रात्री उशिरापर्यंत लोकांची कामे करत असतात. गेली पंचवीस वर्षे त्यांचे या कामात सातत्य आहे. माझ्यासारखा माणूस थकला असता. मात्र, ते उत्साहाने हे सर्व करत आहेत. त्यांच्यासारखा नेता राज्यात नाही. विरोधक असूनही त्यांनी अन्नपूर्णा साखर कारखान्याला मदत केली. कारखान्यासाठी घेतलेल्या कर्जाची नक्कीच आम्ही परतफेड करू. त्यांना चांगले आयुष्य लाभो, अशी ईश्वरचरणी प्रार्थना करतो.’

यावेळी गोकुळचे संचालक युवराज पाटील, पुंडलिक खोडवे, विजय काळे यांनीही मनोगत व्यक्त केले. व्यासपीठावर संजय गांधी निराधार समितीचे अध्यक्ष प्रताप माने, बिद्रीचे संचालक रणजित मुडुकशिवाले, ए. वाय. पाटील-म्हाकवेकर, सरपंच दीपाली कांबळे, बबन खोडवे, पारिसा जंगटे ,धनाजीराव घाटगे, आदी उपस्थित होते उत्तम कांबळे यांनी स्वागत केले. नामदेव चौगुले यांनी आभार मानले.