बालिंगा : जिल्हा प्रशासनाने बालिंगा पूल (Balinga Bridge) वाहतुकीसाठी बंद केल्याने पाच तालुक्यातील जनतेची गैरसोय झाली. याबाबत राजेंद्र सूर्यवंशी यांनी आंदोलन केले, तसेच करवीरचे माजी आमदार चंद्रदीप नरके यांनी मुंबईत मंत्रालयात पालकमंत्री दीपक केसरकर यांची भेट घेऊन कोल्हापूर- गगनबावडा रस्त्यावरील वाहतूक सुरू करावी, अशी मागणी केली.

याबाबत पालकमंत्र्यांनी कोल्हापुरात जिल्हाधिकाऱ्यांसोबत बैठक घेऊन हा मार्ग वाहतुकीसाठी खुला करण्याबाबत निर्णय घेत दुपारी तीनच्या सुमारास रस्ता वाहतुकीस सुरू केला. दरम्यान, पादचारी, दुचाकी व चारचाकी गाड्यांना सोडण्यात आले. मात्र अवजड वाहनांना बंदी असल्याचे सांगितले.

पालकमंत्री केसरकर काल जिल्ह्यातील पूर परिस्थितीची पाहणी करण्यासाठी आले होते. जिल्हाधिकाऱ्यांसोबत बैठक घेऊन कोल्हापूर- गगनबावडा मार्ग सुरू करण्यासाठी पाण्याची पातळी किती आहे आणि बालिंगे पुलाची परिस्थिती पाहून जनतेची गैरसोय दूर करण्यासाठी योग्य तो निर्णय घेण्यात येईल, असे आश्वासन माजी आमदार नरके यांना दिले. यातून दुपारी तीनच्या सुमारास रस्ता वाहतुकीस खुला केला. यामुळे नागरिक, प्रवाशांनी सुटकेचा निःश्वास टाकला.