उजळाईवाडी - खंडणी प्रकरणातील "किशोर माकडवाला गॅंग' विरोधात पोलिसांनी मोका अंतर्गत कारवाई केली. गॅंग प्रमुख किशोर मानेसह सहा जणांचा यात समावेश आहे. गोकुळ शिरगाव पोलिस ठाण्यामार्फत टोळीविरोधात दाखल झालेल्या प्रस्तावास आज विशेष पोलिस महानिरीक्षक मनोज लोहिया यांनी मंजुरी दिली. त्यानुसार संबधित टोळी विरोधात पुढील कारवाईची प्रक्रिया सुरू करण्यात आली असल्याचे स्थानिक गुन्हे अन्वेषण शाखेचे पोलिस निरीक्षक तानाजी सावंत यांनी सांगितले. 

मोका अंतर्गत कारवाई केलेल्या संशयितांची नावे ः टोळी प्रमुख किशोर दडाप्पा माने (रा. शिवाजी पार्क), राकेश बाळू कांबळे (रा. कदमवाडी), विशाल जयसिंग मछले (रा. कसबा बावडा), इरफान सिकंदर शेख (रा. राजेंद्रनगर), किरण दडाप्पा माने (रा. साळोखे पार्क), राहूलसिंग तुफानसिंग दुधाणे (रा. विचारे माळ) अशी आहेत. 

याबाबत पोलिसांनी दिलेली माहिती, जामिऊल अन्सरूल हक (वय 39) हे मुळचे वेस्ट बंगालचे आहेत. सध्या ते तामगांव येथे राहतात. ते लेबर कॉन्ट्रक्‍टर आहेत. संशयितांनी हक यांना 28 ऑगस्ट 2020 ला रात्री अडवले. त्यानंतर त्यांचे अपहरण करून चंदगड, गोकुळ शिरगाव, इस्लामपूर येथे नेले. तू बाहेरील राज्यातून कंपनीत कामगार पुरवतोस, आम्हाला हाफ्ता दे अशी मागणी केली. त्यानंतर त्यांच्याकडील सोन्याचा ऐवज व रोकड असा किमंती ऐवज चाकूचा धाक दाखवून मारहाण करून जबरदस्तीने काढून घेऊन खंडणी मागीतली. अशी फिर्याद हक यांनी दिली. त्यानुसार गोकुळ शिरगाव पोलिस ठाण्यात या गॅंग विरोधात गुन्हा दाखल झाला होता. पोलिसांनी संशयितांवर किरण माने सोडून इतरांवर कारवाई केली. या गुन्ह्याचा तपास सहायक पोलिस निरीक्षक सुशांत चव्हाण यांनी केला. यात संशयित किशोर माने व त्याचे साथिदार 2011 पासून संघटित गुन्हेगारीमध्ये सक्रीय असल्याचे पुढे आले. पोलिस अधीक्षक शैलेश बलकवडे यांनी संबधित टोळीवर मोका अंतर्गत कारवाईचे आदेश दिले. त्यानुसार सहायक पोलिस निरीक्षक सुशांत चव्हाण यांनी संबधित टोळीविरोधात कारवाईचा प्रस्ताव तयार केला. त्या प्रस्तावास विशेष पोलिस महानिरीक्षक लोहिया यांनी मंजुरी दिली. 

 हे पण वाचा - अनैतिक संबंधातून कोयत्याने केला हल्ला अन् कोंडले घरात

टोळीतील संशयितावर शाहूपुरी, जुना राजवाडा, राजारामपुरी, शाहूवाडी आदी कार्यक्षेत्रात 20 गुन्हे दाखल झाले आहेत. त्यात खूनाचा 1, अपहरणासह खंडणीचे 2, दुखापतीसह जबरी चोरीचे 5, जबरी चोरीचे 3, दरोडा 1 आदी गुन्ह्यांचा समावेश असल्याचे सावंत यांनी सांगितले. 

 हे पण वाचा - तर मंगल कार्यालयांवर होणार फौजदारी ; गर्दीचे कार्यक्रम आयोजित कराल तर याद राखा

 पोलिस अधीक्षक शैलेश बलकवडे यांनी दलेल्या आदेशानुसार संघटित गुन्हेगारी खपवून घेतली जाणार नाही. तिचा वेळीच बिमोड केला जाईल. 
 

-सुशांत चव्हाण. सहायक पोलिस निरीक्षक 

संपादन - धनाजी सुर्वे