हातकणंगले : तालुक्‍यातील 20 ग्रामपंचायतींच्या निवडणुकीचा निकाल आज जाहीर झाला. दहा ग्रामपंचायतींमध्ये सत्तांतर झाले. 9 ग्रामपंचायतींमध्ये सत्ता कायम राहिली आहे. एकमेव खोची ग्रामपंचायतीत संमिश्र सत्ता आली. तासगाव ग्रामपंचायतीची निवडणूक बिनविरोध झाली आहे. निवडीनंतर विजयी उमेदवाराच्या समर्थकांनी विजयोत्सव साजरा केला. 20 ग्रामपंचायतींसाठी नोटासाठी झालेले 2 हजार 941 मतदान उमेदवार व नेत्यांना चिंतन करायला लावणारे ठरले आहे. 

निवडणुकीत पक्षीय राजकारणापेक्षा स्थानिक गटातच टोकाची ईर्ष्या रंगली होती. आज सकाळी आठ वाजता प्रांताधिकारी डॉ. विकास खरात, तहसीलदार प्रदीप उबाळे, अपर तहसीलदार शरद पाटील, नायब तहसीलदार दिगंबर सानप आदींच्या मार्गदर्शनाखाली मतमोजणीला सुरवात झाली. सकाळपासूनच झुंडीने कार्यकर्ते तहसील कार्यालयाच्या आवारात जमा होत होते. निकाल लागेल तसा कार्यकर्त्यांचा जल्लोष सुरू होता. 

मातब्बर पराभूत 
582 उमेदवारांपैकी अनेक मातब्बर या निवडणुकीत पराभूत झाले. यामध्ये प्रामुख्याने खासदार धैर्यशील माने यांचे कट्टर सर्मथक झाकीर भालदार, शेतकरी संघटनेचे तालुकाध्यक्ष अरुण मगदूम, माजी उपसरपंच राजू जगदाळे यांना पराभवाला सामोरे जावे लागले. 

दोन-तीन मतांनी पराभव 
रुई येथे ईर्ष्येने मतदान झाले. प्रभाग दोनमधून दीपाली सकटे यांना 541 तर वर्षा घायतिडक यांना 539 मते मिळाली. प्रभाग सहामधून अश्विनी पोवार यांना 474 तर सपना शिंदे यांना 471 मते मिळाली. केवळ दोन व तीन मतांनी पराभव झाल्याने पराभूत उमेदवारांनी फेर मतमोजणीची मागणी केली, मात्र निवडणूक निर्णय अधिकाऱ्यांनी मागणी फेटाळली. 

संपादन - सचिन चराटी

kolhapur