कोल्हापूर : मुंबईत येणाऱ्या आंदोलकांचा मुलाहिजा ठेवणार नाही, असे म्हणणाऱ्या उपमुख्यमंत्री अजित पवार यांचा सकल मराठा समाजातर्फे पत्रकार परिषदेत निषेध करण्यात आला. अजित पवार (Ajit Pawar) मराठाद्वेषी आहेत का, असा प्रश्‍न उपस्थित करत, त्यांना कायद्याचे ज्ञान शून्य असल्याचा आरोप करण्यात आला.

ॲड. बाबा इंदूलकर म्हणाले, ‘मराठा समाजाला ओबीसी प्रवर्गातून आरक्षण हवे आहे. मराठा समाजाला कोर्टात न टिकणारे आरक्षण (Maratha Reservation) देण्याचा त्यांचा विचार दिसत आहे. ईडीची भीती दाखविल्यावर ते भाजपच्या वळचणीला जाऊन बसले आहेत. ते काहीही म्हणत असले तरी येत्या २६ जानेवारीला मराठा समाज लाखोंच्या संख्येने मुंबईत धडकणार आहे. त्यांच्या धमकीला कोणीही घाबरत नाही. मुंबईत गेल्यावर पवार यांची ईडी चौकशी का थांबली, यासाठी ईडीच्या कार्यालयाला आम्ही घेराओ घालणार आहोत.’

वसंतराव मुळीक म्हणाले,‘आरक्षण मिळेपर्यंत मराठा समाज मुंबई सोडणार नाही. ही लोकशाही पद्धतीची लढाई आहे. मराठा समाज कोणत्याही नेत्याला भीक घालणार नाही.’ बाबा पार्टे म्हणाले, ‘उपमुख्यमंत्री अजित पवार जिल्हाधिकारी कार्यालयात १५ ऑगस्टला आल्यावर सकारात्मक बोलले होते. मुंबईला परतल्यावर मात्र त्यांची विचारसरणी बदलली. त्यांच्याकडून समाजाने कोणत्या अपेक्षा ठेवायच्या? त्यामुळे आमच्यावर गुन्हे नोंद झाले तरी चालतील. आम्ही मुंबईत धडक देणारच.’ चंद्रकांत पाटील यांनी पवार यांनी मराठा समाजाला धमकी देऊ नये, असा इशारा दिला.