कोल्हापूर : कोटा पद्धत, वाहनांचे पार्सिंग बंद असल्यामुळे प्रादेशिक परिवहन अधिकारी कार्यालय (आरटीओ) पूर्ण क्षमतेने सुरू करण्याची मागणी ग्राहकांकडून पुढे येत आहे. कोरोना विषाणुच्या लॉकडाऊन मुळे तेथे अद्याप पूर्ण क्षमतेने कामकाज सुरू झालेले नाही. हे कामकाज पूर्ण क्षमतेने सुरू व्हावे, अशी मागणी वाढत आहे. साधारण आठ जून पासून या कार्यालयातील कामकाज पूर्ण क्षमतेने सुरू होईल, अशी अपेक्षा व्यक्त होत आहे. 

कोरोना विषाणुच्या संक्रमणामुळे लॉकडाऊन झाले. यानंतर केवळ दहा-पंधरा टक्‍के कर्मचाऱ्यांवर कामकाज सुरू होते. मात्र गेली काही दिवसापूर्वी पूर्ण बंद असलेले प्रादेशिक परिवहन अधिकारी (आरटीओ) कार्यालयातील कामकाज टप्प्याटप्प्याने सुरू झाले आहे. यामध्ये वाहनांचे पार्सिंग बंद आहे. तसेच कोटा पद्धतीने इतर कामकाज सुरू आहे. वरीष्ठ कार्यालयातील आदेशानुसार हे कामकाज सुरू झाले आहे. मात्र, गेली दोन महिन्यानंतर लॉकडाऊन मध्ये इतर जिल्ह्यातील कामकाज सुरू झाले आहे. अनेक बॅंकामध्येही कामकाज पूर्ण क्षमतेने सुरू आहे. त्यामुळे आरटीओ कार्यालयातील कामकाज सोमवारपासून (ता. 8) सुरू करावे, अशी मागणी ग्राहकांकडून होत आहे. 

अनेक ग्राहकांचे लायसन्स नुतनीकरण सध्या होत नाही, वाहनांचे पार्सिंग होत नाही. कच्चा पक्का परवाना काढण्यासाठी परीक्षा आणि ट्रायल घ्यावी लागते. यामुळे कार्यालय परिसरात गर्दी होते. यातून संसर्ग वाढण्याची शक्‍यता असते, त्यामुळेच कोटा पद्धत ठेवली आहे. साधारण आठ जून पासून प्रादेशिक परिवहन कार्यालयातील कामकाज पूर्ण क्षमतेने सुरू होण्यासाठी प्रयत्न सुरू झाले आहेत. प्रत्यक्षात आजपर्यंत याबाबतचे कोणतेही आदेश वरिष्ठ कार्यालयाकडून प्राप्त झालेले नसल्याचे प्रादेशिक परिवहन अधिकारी डॉ. स्टिव्हन अल्वारीस यांनी "सकाळ'शी बोलताना सांगितले. 

दृष्टिक्षेप
- आरटीओचे काम सध्या कोटा पद्धतीने सुरू 
- वाहनांचे पासिंग बंद असल्याने अडचणी 
- पूर्णपणे कार्यालय सुरू करण्याबाबत वरिष्ठांकडून आदेश नाहीत 
- इतर जिल्ह्यातील कामकाज सुरू