01875
पाऊस आला धावून रस्ता गेला वाहून
भुये -कसबा बावड्याची मार्गाची अवस्था; पिकांचेही नुकसान

भुये, ता. २५ : भुये (ता. करवीर) येथील भुये ते कसबा बावडा रस्त्याचे काम संभगतीने सुरू आहे. तसेच नाले नसल्याने पावसाचे पाणी रस्त्यावरू थेट शेतात जाऊन पिकांचे नुकसान झाले.
भुये-कसबा बावडा मार्ग भुये, भुयेवाडी, जठारवाडी, शिये, सादळे- मादळे, कुशिरे, निगवे या लोकांना जवळचा आहे. २००० पासून रस्त्याला डांबर लागले नव्हते. परंतू रस्त्याचे काम दोन ते तीन महिने सुरू आहे. पावसाळ्यापूर्वी काम पूर्ण करावे, अशी मागणी वाहनधारक व स्थानिक शेतकऱ्यांची होती. येथे सांडपाणी जाण्यासाठी नाल्यांचीही व्‍यवस्था नाही. नाल्याअभावी पावसाचे पाणी रस्तयावर आले. पाण्याला जायला मार्ग नसल्यामुळे सगळे पाणी शेतामध्ये तुंबून राहिले. त्यामुळे पिकाचे मोठ्या प्रमाणावर नुकसान झाले. शेतात दहा दिवसांपूर्वी श्रावण घेवड्याची लागवड केली होती. शेतकरी दिनकर पाटील भुयेकर व शंकर पाटील भुयेकर यांनी ठेकेदाराला वारंवार सांगूनदेखील नाल्याची व्यवस्था केली नाही. त्यामुळे एक एकर क्षेत्रातील श्रावण घेवडा खराब होण्याच्या मार्गावर आहे. लागवडीसाठी ८० हजार रुपये खर्च झाला आहे. नुकताच फुलाच्या अवस्थेमध्ये पीक आले आहे. तोपर्यंत पाण्याने कुजून जाण्याचा मार्गावर आहे. नुकसान झालेल्या पिकांची भरपाई मिळावी, अशी मागणी शेतकरी दिनकर पाटील भुयेकर यांनी केली आहे.