दाखल्यांसाठी पालकांची धावाधाव
महाविद्यालयीन प्रवेशप्रक्रिया सुरू; अतिरिक्त शुल्काची मागणी

सकाळ वृत्तसेवा

बाजारभोगाव, ता. १३ ः महाविद्यालयीन प्रवेशासाठी लागणारे विविध दाखले मिळविण्यासाठी पालकांची धावाधाव सुरू झाली आहे. वय, राष्ट्रीयत्व आणि अधिवास प्रमाणपत्र (डोमिसाईल), उत्पन्न दाखला, नॉन क्रिमीलेअर, ईडब्ल्यूएस दाखला तसेच, आधारकार्ड अपडेट करण्यासाठी प्रामुख्याने धावपळ सुरू आहे. काही महा-ई-सेवा केंद्रचालकाकडून दाखल्यासाठी शासनाने ठरवलेल्या नियमपेक्षा जादा पैसे घेऊन लूट सुरू असल्याचे चित्र दिसत आहे.
अकरावी प्रवेश प्रक्रियेसाठी प्रामुख्याने दहावीची गुणपत्रिका, शाळा सोडल्याचा दाखला, आधारकार्ड, जातीचा दाखला आदी कागदपत्रे लागतात, जन्मदाखला, डोमिसाईल, उत्पन्नाचा दाखला, जातीचा दाखला यासह विविध कागदपत्रे लागतात. ही कागदपत्रे जमविण्यासाठीही पालकांची धावाधाव सुरू आहे. यासाठी शासनाने ठरवून दिलेल्याप्रमाणे शुल्क घ्यावे; असा आदेश असतानाही काही महा ई-सेवा केंद्रांमध्ये वाजवीपेक्षा जादा पैसे घेत आहे. ग्रामीण भागात अडीच हजार ते पाच हजारपर्यंत रकमेची मागणी केली जात आहे. दरम्यान, तहसील कार्यालयांतर्गत कार्यरत असलेले नागरी सुविधा केंद्र आणि शहरातील व ग्रामीण भागातील विविध महा ई-सेवा केंद्रांमध्ये ही कागदपत्रे आणि दाखले मिळण्यासाठी प्रक्रिया सुरू आहे.

कोट १
अकरावी आणि उच्च शिक्षणासाठी सुरू असलेली प्रवेशप्रक्रिया लक्षात घेता विद्यार्थी आणि पालकांकडून डोमिसाईल प्रमाणपत्र, उत्पन्न दाखलल्यासह विविध दाखल्यांची मागणी केली जात आहे. त्यासाठी अर्ज केले जात आहे. निश्चित कालावधीत व योग्य दरात त्यांना प्रमाणपत्र व दाखले उपलब्ध करून देण्यात येत आहेत.
- सनी खापणे, केंद्रचालक, महा-ई-सेवा केंद्र, बाजारभोगाव

प्रवेशासाठी लागणारे दाखले मिळविण्यासाठी पालकांची धावाधाव सुरू आहे. हे पालक ग्रामीण भागातील शेतकरीच आहेत. या दाखल्यांसाठी महा-ई-सेवा केंद्रचालक यांच्याकडून नियमापेक्षा जास्त पैसे घेतात. अशा महा ई-सेवा केंद्रचालकांवर संबंधित अधिकाऱ्यांनी चौकशी करून कारवाई करण्याची गरज आहे.
- बाबूराव डेगळे, किसरूळ, माजी सरपंच

चौकट
दाखल्यांसाठी लागणारा सरासरी कालावधी
उत्पन्नाचा दाखला : ५ ते १० दिवस
डोमिसाईल दाखला : १५ ते २० दिवस
नॉन क्रिमीलेअर : १० ते २० दिवस
ईडब्ल्यूएस दाखला ः १५ ते २५ दिवस