फोटो chd141.jpg

03572
काजू बोर्ड विभागीय कार्यालय
चंदगडला अखेर मंजूर

चंदगड, ता. १४ ः चंदगड, आजरा तालुक्यांतील काजू उत्पादक व प्रक्रिया उद्योजकांच्या सातत्यपूर्ण मागणीनंतर शासनाच्या पणन विभागाने चंदगडला काजू बोर्डाच्या विभागीय कार्यालयाला मंजुरी दिली. वाशी (मुंबई) येथे बोर्डाचे मुख्यालय आणि रत्नागिरी, सिंधुदुर्गपाठोपाठ चंदगडमध्ये विभागीय कार्यालय होईल. सहसचिव डॉ. सुग्रीव धपाटे यांनी हा आदेश काढला.
राज्यात सिंधुदुर्ग, रत्नागिरीपाठोपाठ घाटमाथ्यावरील चंदगड, आजरा, भुदरगडचा पश्चिम भाग, महाराष्ट्र- कर्नाटक सीमाभागात मोठ्या प्रमाणात काजूचे उत्पादन होते. त्यावर आधारित प्रक्रिया उद्योगही याच भागात जास्त आहेत. कमी कष्टात चांगले आर्थिक उत्पन्न देणारे तसेच मोठ्या प्रमाणात रोजगारनिर्मिती करणाऱ्या पिकाच्या लागवडीला चालना मिळावी. संशोधन होऊन काजूच्या नवनवीन जातीची पैदास करता यावी यासाठी काजू बोर्ड स्थापन करावे, अशी मागणी सर्वप्रथम चंदगड, आजरा तालुक्यांतून झाली. त्यासाठी राज्य आणि केंद्र शासनाकडे प्रस्ताव पाठविले. लोकप्रतिनिधी, स्थानिक ग्रामपंचायतींनी सह्यांची मोहिम राबवली. याची दखल घेऊन मेमध्ये शासनाने काजू बोर्डाला मान्यता दिली. निधीचीही तरतूद केली. मात्र बोर्डाचे मुख्यालय वाशी (मुंबई) येथे आणि सिंधुदुर्ग व रत्नागिरी जिल्ह्यात विभागीय कार्यालयांचा समावेश केला. यामुळे दोन्ही विभागीय कार्यालये कोकणात नेण्याऐवजी एक कार्यालय चंदगडला हवे होते असा सूर उमटला. याबाबत आमदार राजेश पाटील, भाजपचे शिवाजीराव पाटील यांच्यासह सर्वपक्षीय लोकप्रतिनिधींनी निवेदने पाठवली. त्यानुसार चंदगडला विभागीय कार्यालयाला मंजुरी मिळाली.

‘सकाळ’चा पाठपुरावा....
चंदगड, आजरा परिसरातील काजू उद्योगाच्या वाढीसाठी ‘सकाळ’ने नेहमीच सकारात्मक लिखाण केले. चंदगडला काजू बोर्ड व्हावे, या मागणीचे प्रथम वृत्त ‘सकाळ’नेच प्रसिध्द केले होते. त्याच्या पाठपुराव्यातही ‘सकाळ’ अग्रेसर राहिला.