दाखला न दिल्याने
उपोषणाचा इशारा
चंदगड : येथील नागरिक महादेव गायकवाड यांना आवश्यक असलेला दाखला नगरपंचायत कार्यालयातून दिला नाही. विचारणा करण्यासाठी गेले असता अधिकाऱ्यांनी उद्धट उत्तरे दिली. याविरोधात जिल्हाधिकारी कार्यालयासमोर १५ एप्रिलपासून उपोषण करणार असल्याचा इशारा त्यांनी दिला आहे. त्यांनी गुरुवारी (ता. २७) तहसील कार्यालयासमोर एक दिवसाचे उपोषण केले. मात्र, प्रशासनाने दखल न घेतल्याने जिल्हाधिकाऱ्यांकडे दाद मागण्यासाठी पुढील आंदोलन कोल्हापूर येथे करणार असल्याचे त्यांनी तहसीलदारांना दिलेल्या निवेदनात स्पष्ट केले आहे. यासंदर्भात नगरपंचायत प्रशासनाशी संपर्क साधण्याचा प्रयत्न केला असता तो होऊ शकला नाही.
-------
वरगाव शाळेचा
सादरीकरणाबद्दल गौरव
चंदगड : वरगाव (ता. चंदगड) प्राथमिक शाळेच्या विद्यार्थ्यांनी पुणे येथे झालेल्या राज्यस्तरीय रंगोत्सव महोत्सवात उत्कृष्ट सादरीकरणाचे बक्षीस पटकावले. महाराष्ट्र राज्य शैक्षणिक संशोधन व प्रशिक्षण परिषदेतर्फे कार्यक्रम झाला. राज्य शैक्षणिक संशोधन व प्रशिक्षण परिषद, पुणेचे संचालक रेखावर, माधुरी सावरकर आदी मान्यवरांच्या उपस्थित शाळेला बक्षीस वितरण केले. अध्यापिका रंजिता देसूरकर व विद्यार्थ्यांनी ते स्वीकारले.