यड्राव येथील खुनी हल्ल्यातील
जखमीचा उपचारादरम्यान मृत्यू

इचलकरंजी, ता.६ : यड्राव (ता. शिरोळ) येथील पार्वती औद्योगिक वसाहतीसमोर झालेल्या खुनी हल्ल्यातील जखमीचा आज उपचारादरम्यान मृत्यू झाला. धीरज लालबिहारी राम असे मृत्यू झालेल्या व्यक्तीचे नाव आहे. या गुन्ह्यातील हल्लेखोर अमन बाणदार याला शहापूर पोलिसांनी अटक केली आहे. सध्या तो पोलिस कोठडीत असून त्याच्यावर खुनाचा गुन्हा दाखल करण्यात येणार असून याबाबतचा अहवाल न्यायालयास पाठवणार येणार असल्याची माहिती शहापूरचे सहाय्यक पोलिस निरीक्षक अभिजीत पाटील यांनी दिली.
याबाबत अधिक माहिती अशी, खोतवाडीतील यंत्रमाग कारखान्यात धीरज राम आणि अमन बाणदार हे दोघे काम करत होते. घर खर्चासाठी धीरज यांनी अमनकडून उसने १० हजार रुपये घेतले आणि त्यापैकी काही रक्कम परतही केली होती. उर्वरीत रक्कमेसाठी अमन आणि धीरज यांच्यात वाद झाला होता. या वादातून अमन याने धीरजच्या पाठीत, कपाळावर चाकूने जबरी वार केले होते. या हल्ल्यात गंभीर जखमी झालेल्या धीरजवर सांगली सिव्हील रुग्णालयात गेल्या दोन दिवसांपासून उपचार सुरू होते. आज त्याचा उपचारादरम्यान मृत्यू झाला. दरम्यान, पोलिसांनी बाणदार याला अटक केली असून त्याच्यावर खुनाचा गुन्हा दाखल करण्यात येणार आहे.