दर स्थीर; बाजारात नवी साखर
हंगाम जोमात ः देशांतर्गत प्रतिक्विंटलचे दर ३६००-३७०० रुपये

सकाळ वृत्तसेवा
जयसिंगपूर, ता. २८ : राज्यात ऊस हंगाम जोमात सुरू असून नवी साखरही बाजारात येऊ लागली आहे. देशांतर्गत प्रतिक्विंटलचे दर ३६००-३७०० रुपयांवर स्थिरावले आहेत. नव्याने उत्पादित होणारी साखर लक्षात घेता कारखाने जुनी साखर विक्री करत आहेत.
राज्यात १ नोव्हेंबरपासून ऊस हंगाम सुरू झाला. मात्र, ऊस दरावरून काही जिल्ह्यातील कारखाने तीन आठवडे बंद राहिले. दराचा प्रश्न मार्गी लागल्यानंतर कारखाने सुरू झाले. नव्याने साखर निर्मितीआधी जुनी साखर विक्रीसाठी कारखान्यांची धावपळ सुरू आहे. देशात उत्तर प्रदेश वगळता अन्य साखर उत्पादक राज्यांमध्ये साखर उत्पादन धीम्या प्रमाणात सुरू आहे. यामुळे सध्या तरी अनेक कारखाने जुनी साखरच विकत असल्याचे चित्र आहे.
केंद्राने साखरेचे भाव वाढू नयेत यासाठी पंधरा-पंधरा दिवसांच्या अंतराने कोटे दिल्याने साखरेच्या किंमती अजूनही नियंत्रणात असल्याचे चित्र आहे. किरकोळ बाजारात ४२ रुपये किलोपर्यंत साखरेची किंमत गेली असली तरी कारखाना पातळीवर मात्र ही किंमत ३६००-३७०० क्वचित प्रसंगी ३८०० इतकी असल्याचे सांगितले जात आहे.
दिवाळीदरम्यान पंधरा दिवस साखरेला चांगली मागणी होती. या दरम्यान अनेक साखर कारखान्यांना ३७०० ते ३८०० रुपयांनी साखर विकता आली. दिवाळीनंतर बहुतांश बाजारपेठेतून साखरेला मागणी काहीशी कमी आहे. देशाचा साखर हंगाम सुरू होऊन दोन महिने झाले आहेत. मात्र अद्यापही नवी साखर अपेक्षेप्रमाणे बाजारात आली नाही. महाराष्ट्रामध्ये आंदोलनामुळे जवळजवळ गेल्यावर्षीच्या तुलनेत पन्नास टक्के साखरेचे उत्पादन कमी झाले आहे. कर्नाटकातही फारशी वेगळी परिस्थिती नाही. यामुळे कारखान्याकडे मोठ्या विक्रीसाठी नवी साखर अजून उपलब्ध नसल्याचे चित्र आहे. हळूहळू कारखाने गाळपास गती घेतील. पंधरा दिवसात साखरेचे उत्पादन महाराष्ट्र, कर्नाटकमध्येही गती घेईल अशी शक्यता आहे.
----------
चौकट
शीतपेय उद्योगातील मागणीवर दर अवलंबून
गेल्या वर्षीच्या तुलनेत साखर उत्पादन कमी होणार हे निश्चित असल्याने त्याचा परिणाम यंदा देशातंर्गत बाजारामध्येही जाणवेल. मागणी कमी, जास्त होत असली तरी एकदम मागणी कमी होण्याची शक्यता नसल्याचे साखर उद्योगातून सांगण्यात येत आहे. अन्न मंत्रालयाने डिसेंबरसाठी २४ लाख टनांचा कोटा दिला आहे, जो नोव्हेंबरच्या तुलनेत १ लाख टन अधिक आहे. आगामी काळात शीतपेय उद्योगातून मागणी कशी राहते यावरच साखरेचे दर कितपत वाढतील हे निश्चित होईल.