कमर्शिअल बँकेसाठी १६.९५ टक्के मतदान
कोल्हापूर, ता. १२ : रंगपंचमी आणि सुटीचा दिवस असल्याने मतदारांनी मतदानाकडे पाठ फिरवल्याने कमर्शिअल को-ऑपरेटिव्ह बँकेच्या १५ पैकी ११ जागांसाठी आज केवळ १६.९५ टक्के मतदान झाले. १८ हजार १३६ पैकी केवळ तीन हजार ७५ सभासदांनी मतदान केले. मतमोजणी उद्या (ता. १३) मार्केट यार्ड येथील शाहू सांस्कृतिक हॉलमध्ये सकाळी आठपासून सुरू होईल. प्रदीप मालगावे यांनी निवडणूक निर्णय अधिकारी म्हणून काम पाहिले.
बँकेच्या १५ पैकी तीन जागा यापूर्वीच बिनविरोध झाल्या आहेत; तर उर्वरित ११ जागांसाठी १४ उमेदवार रिंगणात होते. आज सकाळी आठपासून आयर्विन ख्रिश्‍चन हॉलमध्ये मतदान झाले. मात्र, याला अल्प प्रतिसाद मिळाला. मतदान केंद्रावर मतदान अधिकारी आणि कर्मचाऱ्यांना अक्षरशः ताटकळत बसावे लागत होते. ही निवडणूक बिनविरोध व्हावी, यासाठी प्रयत्न झाले. याला यश आले नाही. त्यामुळे ११ जागांसाठी मतदान झाले. मतदान केंद्रावर कोणत्याही प्रकारची चुरस नव्हती, ईर्ष्या नव्हती किंवा मतदारांना ने-आण करण्यासाठी यंत्रणा नव्हती. उद्या सकाळी मतमोजणी होणार आहे. यासाठी १८ टेबलवर १०८ कर्मचारी व अधिकारी काम करतील. दुपारपर्यंत सर्व निकाल जाहीर केला जाण्याची शक्यता आहे.