बेळगुंदीत साडेनऊ कोटींच्या
विकासकामांचे आज लोकार्पण
गडहिंग्लज, ता. १६ : बेळगुंदी (ता. गडहिंग्लज) येथे उद्या (ता. १७) साडे नऊ कोटींच्या विकासकामांचे लोकार्पण आमदार हसन मुश्रीफ यांच्याहस्ते होणार आहे. जिल्हा परिषदेचे माजी उपाध्यक्ष सतीश पाटील-गिजवणेकर अध्यक्षस्थानी असतील. मराठी शाळेच्या आवारात सायंकाळी चार वाजता हा कार्यक्रम होणार आहे.
आमदार मुश्रीफ यांच्या विशेष प्रयत्नातून आणि श्री. पाटील यांच्या पाठपुराव्यातून गावात साडेनऊ कोटींची विकासकामे झाली आहेत. बेळगुंदी-इंचनाळ रानातील वस्ती रस्ता सुधारणा, जलजीवन पाणीपुरवठा योजना, बेळगुंदी-इंचनाळ-हारुर रस्ता रुंदीकरणासह सुधारणा, २०२०-२१ मध्ये पूर्ण झालेली पिकअप शेड, अंतर्गत रस्ते, लोखंडे घराकडे जाणारा रस्ता, अंतर्गत रस्ता खडीकरण, २०२१-२२ मध्ये पूर्ण झालेली रस्ते, हायमास्ट, मंदिर सुशोभिकरण, रस्ता सुधारणा आणि २०२२-२३ मध्ये पूर्ण झालेल्या बेघर वसाहत रस्ता, स्मशानशेड सुधारणा, दलित वस्तीत पेव्हींग ब्लॉक, अंतर्गत रस्ते आदी विकासकामांचे लोकार्पण होणार आहे.