१०० कोटींच्या रस्ते कामासाठी
सोमवारनंतर ठरणार ठेकेदार

कोल्हापूर, ता. २२ ः शहरातील १०० कोटींच्या रस्ते कामासाठी भरलेल्या तीन निविदाधारकांपैकी एक कंपनी अपात्र ठरली. उर्वरित दोन्ही कंपन्यांनी जादा दराची निविदा भरली असून सोमवारनंतर त्यांतील एक कंपनी निश्‍चित केली जाणार आहे.
१६ रस्त्यांसाठी महापालिकेने निविदा मागवल्या होत्या. पहिल्यांदा प्रतिसाद मिळाला नसल्याने फेरनिविदा काढण्यात आली. त्यात तीन कंपन्यांनी निविदा भरली. त्या निविदांची तांत्रिक छाननी केली जात होती. एका कंपनीला येथील डांबर प्रकल्पाबाबतची कागदपत्रे सादर करण्यास सांगण्यात आले होते; पण ती सादर करता आली नसल्याने त्या कंपनीला अपात्र ठरवण्यात आले. उर्वरित दोन कंपन्या या फेरीत पात्र ठरल्या. त्यांचे कोटेशन उघडल्यानंतर दोन्ही कंपन्यांनी जादा दर भरले असल्याचे समजले. त्यामुळे त्यांनी भरलेल्या दराची महापालिका पडताळणी करणार आहे. दोन दिवस सुट्या असल्याने दोन कंपन्यांपैकी एक कंपनी सोमवारनंतर निश्‍चित केली जाणार आहे.
पुढील आठवड्यात निविदाधारक निश्‍चित करून त्याची उर्वरित प्रक्रिया पूर्ण केली जाणार आहे. त्यामुळे ऑक्टोबरमध्ये प्रत्यक्ष कामाला सुरूवात होण्याची शक्यता आहे. या निविदेत अनेक महत्त्वाच्या रस्त्यांचा समावेश असल्याने या कामाकडे शहरवासीयांचे डोळे लागले आहेत.