जिल्हा परिषद ... लोगो
...

आरोग्य विभागाच्या वाहन विम्याचे त्रांगडे

रुग्‍णांसह डॉक्‍टर, चालकांचा जीव धोक्यात

सकाळ वृत्तसेवा
कोल्‍हापूर, ता.२२: जिल्‍हा परिषद आरोग्य विभागाच्या वाहनांच्या विम्याचा प्रश्‍‍न अजूनही सुटलेला नाही. सध्या तरी आरोग्य विभागाकडून विमा काढल्याचा दावा करण्यात येत आहे. मात्र वाहन चालकांच्या कार्यशाळेत अनेकांनी विमा निघाला नसल्याचे सांगत, आरोग्य विभागाची पोलखोल केली आहे. विमा नसताना धावणारी वाहने दररोज मोटार वाहन नियमांचे उल्‍लंघन करत आहेत. तसेच हजारो रुग्‍णांसह डॉक्‍टर, चालकांचा जीवही धोक्यात घातला जात आहे.

जिल्‍ह्यातील प्राथमिक आरोग्य केंद्रांसाठी अॅम्‍ब्युलन्‍स देण्यात आल्या आहेत. त्या आरोग्य विभागाच्या कॅम्‍पसाठी वैद्यकीय अधिकारी तसेच कर्मचाऱ्यां‍ना ने-आण करण्याचे काम करतात. तसेच इतरवेळी गर्भवती महिलांना प्रसुतीसाठी प्राथमिक आरोग्य केंद्रात आणणे व पुन्‍हा घरी नेण्याचे काम करतात. मात्र यातील बहुतांश वाहनांना विमाच नसल्याचे स्‍पष्‍ट झाले आहे. ही वाहने विनाविमा बेकायदेशीर फिरत आहेत. यातच चंदगड येथील वाहनाला अपघात होवून तीन कर्मचाऱ्यां‍चा मृत्यू झाला. त्यातून अनेक प्रश्‍‍न निर्माण झाले आहेत. तरीही आरोग्य विभाग वाहनांचा विमा उतरण्याबाबत गंभीर नसल्याचे दिसत आहे. वाहन चालकांनी याबाबत तक्रारही केली आहे.
...

दृष्टीक्षेपात ...

वाहन संख्याः ७५
कायम वाहन चालक ः१२
कंत्राटी वाहन चालक ः५०
दररोज हजारो रुग्‍णांची वाहतूक
...
स्‍वनिधीतून ८० लाख भरपाई

चंदगड येथील हेरे प्राथमिक आरोग्य केंद्राच्या वाहनाला अपघात झाला. या अपघातात तीन लोक मृत्यूमुखी पडले. यातील एका वैद्यकीय अधिकाऱ्या‍च्या मृत्यूप्रकरणी कर्नाटक येथील न्यायालयात खटला दाखल झाला होता. या प्रकरणी जिल्‍हा परिषदेच्या निधीतून सुमारे ८० लाख इतकी नुकसान भरपाई देण्यात आली आहे. विकासकामांचा निधी या कामी न देता, तो आरोग्य विभागातून घेण्याची मागणी सदस्यांनी केली होती. मात्र तरीही हा निधी देण्यात आला. ही रक्‍कम आता स्‍वनिधीत येणार कशी, असा प्रश्‍‍न निर्माण झाला आहे.