श्रेष्ठी मैदानावर प्रेक्षक गॅलरी
उभारणीची कांबळेंची मागणी
पालिका मुख्याधिकारी खारगे यांना निवेदन
सकाळ वृत्तसेवा
गडहिंग्लज, ता. २१ः संकेश्‍वर रोडवरील भीमनगर परिसरात असलेल्या म. दुं. श्रेष्ठी विद्यालयाच्या मैदानावर प्रेक्षक गॅलरी आणि ओपन जीमची सुविधा उपलब्ध करून देण्याची मागणी माजी नगरसेविका रेश्मा कांबळे यांनी केली आहे.
याबाबत मुख्याधिकारी स्वरूप खारगे यांना निवेदन दिले आहे. त्यात म्हटले आहे की, परिसरातील भीमनगरसह संकेश्‍वर रोडवरील अनेक वसाहतीमधील मुले-मुली, युवकांना खेळासाठी आणि ज्येष्ठांना व्यायामासाठी एकमेव मैदान आहे. याठिकाणी रोज सरावासाठी खेळाडूंची गर्दी होत असते. तसेच विविध स्पर्धाही येथे घेण्यात येतात. अनेक सांस्कृतिक स्पर्धाही होत असतात. तेव्हा याठिकाणी प्रेक्षक गॅलरीची सोय आवश्यक आहे. तसेच शालेय मुले, ज्येष्ठांसाठी ओपन जीमची सुविधाही द्यावी. या प्रभागातील नागरिकांना मुबलक नागरी सुविधा देण्यासाठी निधी देण्याची मागणी आहे.
दरम्यान, कांबळे यांनी दलित वस्तीमध्ये येणाऱ्या या प्रभागात भीमनगर बारामती चौक, पाटणे चौक, हारूण सय्यद घरासमोर भीम सरकार चौक, डॉ. बाबासाहेब आंबेडकर हॉल, दुंडगा मार्गावर यमगेकर यांच्या घरासमोर आणि म. दुं. श्रेष्ठी विद्यालयाजवळ सोलर हायमास्ट दिवे बसविण्याची आवश्यकता असल्याचे निवेदनातून सुचविले असून वैशिष्ट्यपूर्ण निधीतून ही कामे तत्काळ पूर्ण करावीत, अशी मागणी आहे.