पोलिओ लसीकरण मोहीम रविवारी
: जिल्हाधिकारी : शून्य ते ५ वयोगटातील बालकांना पोलिओ डोस
---
सकाळ वृत्तसेवा
कोल्हापूर, ता. १ : पोलिओ निर्मूलनाचे उद्दिष्ट साध्य करण्यासाठी शून्य ते ५ वयोगटातील सर्व बालकांना रविवार, ता. ३ रोजी पोलिओ डोस देण्यात येणार आहे. या अनुषंगाने शासकीय कर्मचाऱ्यांना सर्वतोपरी सहकार्य करुन पल्स पोलिओ लसीकरण मोहीम शंभर टक्के यशस्वी करावी, असे आवाहन जिल्हाधिकारी अमोल येडगे यांनी केले आहे.
पोलिओ निर्मुलनासाठी नियमित लसीकरणांतर्गत सर्व पात्र बालकांचे वेळेत लसीकरण करणे, संशयित पोलिओ रुग्णांचा शोध घेऊन त्याचे निदान करणे, शून्य ते ५ वयोगटातील बालकांना अतिरिक्त पोलिओ डोस देणे ही त्रिसुत्री आहे. पर्यटन व जागतिकीकरणामुळे पोलिओ विषाणू पसरण्याची शक्यता असल्यामुळे शून्य ते ५ वयोगटातील बालकांसाठी पोलिओचे दोन थेंब महत्त्वाचे आहेत. अगदी बाळ नुकतेच जन्मलेले असले तरी पोलिओ डोस द्यावयाचा आहे. या मोहिमेअंतर्गत जिल्ह्यामध्ये ग्रामीण, शहरी तसेच महानगरपालिका विभागांतर्गत मागील तीन मोहिमेतील अहवालानुसार जिल्ह्यामध्ये शून्य ते ५ वयोगटातील अंदाजे ३ लाख ७ हजार बालकांना पोलिओ डोस देण्यात येणार आहे. या मोहिमेसाठी ग्रामीण व शहरी मिळून २हजार२६८ लसीकरण केंद्राससह ६५४ मोबाईल टीम, ३९० ट्रान्झीट टीम स्थापन आहे.
-----
रविवारनंतर घरभेटी
रविवार, ता. ३ नंतर ग्रामीण भागात ३ दिवस व शहरी भागात ५ दिवस घरभेटीचे नियोजन करण्यात आले आहे. यासाठी ३ हजार ६५ आयपीपीआय टीम नेमल्या आहेत. या टीमद्वारे घरभेटीद्वारे पल्स पोलिओ लसीकरण मोहिमेअंतर्गत सर्व बालकांना पोलिओ लस दिल्याची खात्री करण्यात येणार आहे, तसेच वंचित लाभार्थ्यांना तात्काळ पोलिओचा डोस देण्यात येणार आहे.
-----
गर्दीच्या ठिकाणी ट्रान्झीट टीमची सोय
जिल्ह्यातील सर्व बाजारहाट गर्दीची ठिकाणे, धार्मिक स्थळे, बस स्थानके, टोल नाके व रेल्वे स्टेशन्स या ठिकाणी सुद्धा ट्रान्झीट टीमची सोय करण्यात आली आहे. तसेच दुर्गम भागातील वाड्यावस्त्यावरील भटक्या जमाती, ऊस तोडणी मजूर यांच्या मुलांना मोबाईल टीमद्वारे पोलिओ डोस देण्याची व्यवस्था करण्यात आलेली आहे.