पंचगंगा स्मशानभूमीच्या
विस्तारीकरणाचे काम थांबवा

उदय गायकवाड यांची प्रशासकांकडे मागणी

कोल्हापूर, ता. ३ ः पंचगंगा नदी काठावरील समाधी स्थळ व परिसरास बाधा पोचवल्याबाबत महापालिकेचे अधिकारी व ठेकेदारावर गुन्हा दाखल करावा. तसेच स्मशानभूमीचे विस्तारीकरणाचे काम त्वरित थांबवावे, अशी मागणी उदय गायकवाड यांनी प्रशासक व जिल्हा पोलिस अधीक्षकांकडे केली.
गायकवाड यांनी दिलेल्या निवेदनात म्हटले आहे, स्मशानभूमीनजीक छ्त्रपतींनी सन्मानपूर्वक ‘राव विश्वासराव’ व ‘सरखवास’ असा किताब दिलेल्या गायकवाड घराण्यातील ज्येष्ठांच्या समाधी आहेत. स्मशानभूमीचा विस्तार करताना त्या पाडल्या आहेत. कोणतीही परवानगी अथवा मान्यता घेतली नाही. वारसा वास्तुस बाधा पोचवणे, विटंबना करणे, भावना दुखावणे अशा कृती घडल्या आहेत. समाधी वास्तूला बाधा पोचवून आम्हा कुटुंबीय व कोल्हापूरकरांच्या भावना दुखावल्या आहेत. सर्वोच्च न्यायालयाच्या आदेशानुसार देशातील १०८ शहरे हवा प्रदूषित असल्याने राष्ट्रीय स्वच्छ हवा मिशन अंतर्गत शहराचा समावेश आहे. पारंपरिक पद्धतीने दहन करण्याने मोठ्या प्रमाणात हवा प्रदूषण होते, याबाबत समितीच्या सभेत चर्चा झाली आहे. त्या ठिकाणी विद्युत दाहिनी बसवावी असे निर्णय झाले असताना पुन्हा जुन्या स्मशानभूमीचा विस्तार करणे गैर व सर्वोच्च न्यायालयाच्या आदेशाचा अवमान करणारे आहे. त्यामुळे हे काम त्वरित थांबबावे. विटंबना झालेल्या समाधीचे बांधकाम त्वरित करून पूर्ववत करावे. ही बाब सर्वोच्च न्यायालयाच्या निदर्शनास आणून देत आहोत.