कारभार पारदर्शी म्हणूनच
‘गोकुळ’ला ‘क्लीन चिट’ः डोंगळे

शौमिका महाडिक यांच्या आरोपाला प्रत्युत्तर

कोल्हापूर, ता. ६ ः सत्तातरानंतर ‘गोकुळ’च्या प्रगतीची चौफेर घोडदौड सुरू असून, काटकसरीचा कारभार व कामकाजाचे सूक्ष्म नियोजन यामुळे संघाच्या दैनंदिन दूध संकलनात गतवर्षीच्या तुलनेत अडीच लाखाने वाढ झाली आहे. संघाचा कारभार पारदर्शी व सभासदाभिमुख असल्यानेच चाचणी लेखापरीक्षणामधून काहीही निष्पन्न झाले नाही. त्यामुळेच ‘गोकुळ’ला क्लीन चिट दिलेली आहे, असे प्रत्युत्तर संघाचे अध्यक्ष अरुण डोंगळे यांनी दिले.
संघाच्या संचालिका शौमिका महाडिक यांनी केलेल्या आरोपाबाबत डोंगळे यांनी निवेदनाद्वारे खुलासा केला. उच्च न्यायालयाने ‘गोकुळ’च्या कारभारावर ताशेरे ओढलेले नाहीत. ‘गोकुळ’चे चाचणी लेखापरीक्षण कोणामुळे सुरू झाले, हे सर्वांना माहीत आहे. तक्रार करणाऱ्यांनीच, संचालक मंडळ बरखास्त झाले असते म्हणून मीच गोकुळवरील कारवाई थांबवली, असे म्हणणे हे चुकीचे आहे. अशा पद्धतीचे वक्तव्य करून सभासदांची दिशाभूल करू नये, असेही निवेदनात म्हटले आहे.
महालक्ष्मी पशुखाद्य कारखान्यामध्ये पशुखाद्य वाहतूक करणाऱ्या वाहनांच्या वाहतूक भाडेवाढ प्रकरणाची स्वतंत्र चौकशी सुरू आहे. दोषी संस्थांवर कारवाई करून नुकसानीची रक्कम वसूल केली जाईल. पशुसंवर्धन विभागाकडील औषधांची खरेदी ही एन.डी.डी.बी.ने दिलेल्या निर्देशनानुसार वर्तमानपत्रामध्ये टेंडर प्रसिद्ध करून केली जाते. निनावी पत्राबाबत प्राथमिक माहिती घेतली असता, पत्रामध्ये उल्लेख केलेल्या पशुवैद्यकीय अधिकाऱ्यांनी नुकताच १ एप्रिल २०२४ ला पशुसंवर्धन विभागप्रमुख म्हणून पदभार स्वीकारला आहे. त्यांच्याबाबतीत लिहिलेल्या मजकुरामध्ये तथ्य नसून, हे व्यक्तिगत द्वेषातून तसेच ‘गोकुळ’च्या बदनामीच्या हेतूने हे पत्र पाठविल्याचे डोंगळे यांनी म्हटले आहे.