विभागीय क्रीडा संकुलाचे
काम मार्गी लावू ः मुश्रीफ

जिल्हा नियोजन मंडळाच्या बैठकीत ग्वाही

सकाळ वृत्तसेवा
कोल्हापूर, ता. ६ ः ‘विभागीय क्रीडा संकुलाचे काम मार्गी लावू. याबाबत क्रीडा क्षेत्रातील सुधारणांसाठी क्रीडा संघटनांच्या प्रतिनिधींनी सूचना कराव्यात. विधानसभेच्या अधिवेशनानंतर संकुलाच्या पाहणीसह बैठक आयोजित करा,’ अशी सूचना पालकमंत्री हसन मुश्रीफ यांनी केली. जिल्हा नियोजन मंडळाच्या आज झालेल्या बैठकीत ते बोलत होते.
पाच जिल्ह्यांसाठी असलेल्या विभागीय क्रीडा संकुलाचे काम संथगतीने सुरू आहे. झालेली कामे अपुरी, दर्जाहीन आहेत. या पार्श्‍वभूमीवर जिल्हाधिकारी कार्यालयात बैठकीचे आयोजन केले होते. आतापर्यंत झालेल्या कामांचा आढावा उपसंचालक माणिक पाटील यांनी मांडला. यानंतर निमंत्रित सदस्य हिंदकेसरी दीनानाथ सिंह, प्रा. अमर सासने, प्रकुल मांगोरे-पाटील यांनी त्रुटी, आवश्‍यक कामांबाबतच्या सूचना केल्या. संकुलामध्ये मातीचा आखाडा व्हावा, ज्येष्ठ वस्ताद व मल्लांच्या मानधनात वाढ करावी, तज्ज्ञ प्रशिक्षकांची नेमणूक करावी, सिंथेटिक ट्रॅक व्हावा, संकुलाला छत्रपती संभाजी महाराजांचे नाव द्यावे, संकुलाला मॅटही द्यावा, अशा सूचना मांडल्या. याबाबत पालकमंत्र्यांनी प्रस्ताव देण्याची सूचना केली.
बैठकीस खासदार धैर्यशील माने, खासदार धनंजय महाडिक, आमदार राजेश पाटील, जिल्हाधिकारी अमोल येडगे, मुख्य कार्यकारी अधिकारी कार्तिकेयन एस. पोलिस अधीक्षक महेंद्र पंडित, जिल्हा क्रीडाधिकारी नीलिमा आडसूळ, तालुका क्रीडा अधिकारी सचिन चव्हाण, सुधाकर जमादार, स्नेहल पाटील, शाम जाधव आदी उपस्थित होते.
......