07353
...

‘त्र्यंबोली’स नैवेद्य देण्यासाठी
कोल्हापूरकरांची लगबग

सकाळ वृत्तसेवा
कोल्हापूर, ता. २७ ः श्रावणातील चौथ्या मंगळवारनिमित्त त्र्यंबोली देवीला नैवेद्य अर्पण करण्यासाठी रिमझिम पावसातही भाविकांनी गर्दी केली. आषाढ महिन्यात मासांहाराचा नैवेद्य, श्रावणात पुरणपोळीचा गोड नैवेद्य व नवरात्रीत देवीला तेल अर्पण करण्याची परंपरा आजही कोल्हापूरकरांनी जपली आहे. याच्याच माध्यमातून श्रावणातील मंगळवारी व शुक्रवारी देवीला नैवेद्य अर्पण करण्यासाठी टेंबलाई टेकडीवर भाविकांची गर्दी होते. आजही भाविकांनी नैवेद्य देण्यासाठी हजेरी लावली.
श्रावणातल्या मंगळवारी व शुक्रवारी या दोन दिवशीच नैवेद्य अर्पण करण्यासाठी गर्दी न करता इतर सुटीच्या दिवशीही नैवेद्य अर्पण करा, असे आवाहन गुरव समाजाने केल्यानंतर यंदा पहिल्यांदाच इतर दिवशी नैवेद्य व शिधा अर्पण करण्याला भाविकांनी प्राधान्य दिले. श्रावण चौथ्या मंगळवारनिमित्त श्री त्र्यंबोली देवीची अलंकारिक उभी पूजा प्रदीप गुरव, मधुकर गुरव, संतोष गुरव यांनी बांधली. सकाळी श्रीसुक्त महाअभिषेक झाला. त्यानंतर दिवसभर नैवेद्य स्वीकारण्याची लगबग सुरू राहिली.