फोटो-31047

श्री कपिलेश्वर मंदिर
अतिक्रमणमुक्त करा

भाजपची मागणी, प्रशासकांना निवेदन

सकाळ वृत्तसेवा
कोल्हापूर, ता. ११ ः शहराचे ग्रामदैवत श्री कपिलेश्वर हे प्राचीन मंदिर असून, तो कोल्हापूरचा सांस्कृतिक, धार्मिक ठेवा आहे. परंतु, या मंदिराभोवती वर्षानुवर्षे टपऱ्या, फळ विक्रेते, भाजी विक्रेते यांनी अतिक्रमण केले आहे. महापालिका प्रशासनास वारंवार सूचना करूनही याकडे लक्ष दिले जात नाही. हे मंदिर त्वरित अतिक्रमणमुक्त करून तेथे स्वच्छता ठेवावी. अन्यथा भारतीय जनता पक्षाच्या वतीने तीव्र आंदोलन करण्यात येईल. या मागणीचे निवेदन उपायुक्त साधना पाटील यांना दिले.
जिल्हा उपाध्यक्ष हेमंत आराध्ये म्हणाले, ‘कोल्हापूरचे ग्रामदैवत श्री कपिलेश्वर मंदिराची जी दुरवस्था झाली आहे. ती अतिशय दयनीय आहे. तसेच भक्तांना प्रदक्षिणा घालण्यासाठी जो बाहेरील मार्ग आहे तो संपूर्णत: अतिक्रमनाच्या विळख्यात आहे. मंदिराच्या शिखरावर झाडे-झुडपे वाढलेली आहेत. मंदिराच्या भोवती असणारी गटर्स कधीच साफ केली जात नाहीत. त्यामुळे महापालिका प्रशासनाने वरील बाबींचा गांभीर्याने विचार करून विषयाशी संबंधित विभागांना सूचना देऊन कडक कारवाई करावी.’
उपायुक्त साधना पाटील म्हणाल्या, ‘दोन दिवसात प्रत्यक्ष कपिलतीर्थ मंडई येथे येऊन मंदिर व परिसर अतिक्रमणमुक्त करू.’ जिल्हा सरचिटणीस गायत्री राऊत, युवा मोर्चा अध्यक्ष गिरीश साळोखे, संग्राम जरग, विजय आगरवाल, प्राची कुलकर्णी, युवराज शिंदे, भारत भोसले, सचिन पोवार, अनिश पोतदार उपस्थित होते.