लोगो
सांगली-कोल्हापूर
रखडलेला महामार्ग
००००००००००

सांगली फाटा ते अंकली
टप्प्याला अखेर मुहूर्त
‘अवंतिका’ला काम; प्रक्रिया अंतिम टप्प्यात

सकाळ वृत्तसेवा
हातकणंगले, ता. ८ ः कोल्हापूर-सांगली महामार्गातील अनेक वर्षे प्रलंबित असलेल्या सांगली फाटा -चोकाक- अंकली रस्त्याच्या कामास अखेर मुहूर्त मिळाला आहे. हा टप्पा ३३ किलोमीटरचा असून, एकूण ११९२. ८४ कोटी निधीतून चौपदरीकरणासाठी निविदा प्रक्रिया अंतिम टप्प्यात आहे. यासाठी एकूण १२ ठेकेदारांनी निविदा सादर केल्या होत्या. त्यापैकी अवंतिका कन्स्ट्रक्शनची निविदा अंतिम मानली जात आहे. त्यांनी ८.१४ टक्के कमी दराने ही निविदा भरली आहे.
या कामांतर्गत हातकणंगले येथे सुमारे १२५० मीटरचा उड्डाण पूल, तर कृष्णा नदीवर ३५० मीटरचा नव्याने पूल बांधण्यात येणार आहे. कोल्हापूर-सांगली रस्त्यासाठी अनेकवेळा आंदोलने झाली. त्यामुळे रस्त्यासाठी २०१२ मध्ये सुप्रिम कंपनीला काम दिले; मात्र कंपनीने हे काम अर्धवट सोडले होते.
मुळात हा रस्ता सार्वजनिक बांधकाम विभागाकडे असल्याने राष्ट्रीय महामार्ग प्राधिकरण यासाठी निधी देऊ शकत नव्हते आणि सार्वजनिक बांधकामकडे एवढ्या निधीची उपलब्धता नव्हती. अखेरीस केंद्रीय वाहतूक आणि महामार्गमंत्री नितीन गडकरी यांनी या रस्त्याचे नुकतेच महामार्ग प्राधिकरणाकडे हस्तांतरण केले. हस्तांतरण होताच प्रकल्प अहवाल तयार होऊन ११९२.८४ कोटींचा प्रस्ताव मंजूर झाला.
सुमारे ३३ किलोमीटरच्या रस्त्यासाठी ७५० कोटींचा निधी मंजूर आहे. सुमारे ४४२ कोटींचा निधी इतर सोयी-सुविधांसाठी राखीव ठेवला आहे. हातकणंगले बसस्थानकासमोर १२५० मीटरचा उड्डाण पूल बांधण्यात येणार आहे. पूर्ण मार्गावर १५ अंडर पास असतील. ठेकेदाराचे नाव अंतिम झाले असून, तसा अहवाल राष्ट्रीय महामार्ग प्राधिकरणांकडे वर्ग केला जाईल. ठेकेदाराला काम सुरू करण्यासाठी सहा महिन्यांची मुदत दिलेली असते. त्यामुळे मे किंवा जूनपर्यंत प्रत्यक्ष कामाला सुरुवात होण्याची शक्यता आहे.

दृष्टिक्षेपात
एकूण ३३ किलोमीटरचा रस्ता
संपूर्ण महामार्गासाठी ११९२.८४ कोटींची तरतूद
केवळ रस्त्यासाठी ७५० कोटींचा निधी
हातकणंगले व कृष्णा नदीवर उड्डाण पूल
महामार्गावर एकूण १५ ठिकाणी अंडर पास

कोट
महामार्गासाठी ठेकेदार निश्‍चित झाला आहे; मात्र अद्याप तसा आदेश आमच्यापर्यंत पोहोचलेला नाही; परंतु लवकरच कामाला सुरुवात होईल.
- चंद्रकांत भरडे, अभियंता, राष्ट्रीय महामार्ग प्राधिकरण