61954

‘प्रायव्हेट क्लासेस टीचर्स’चा
५ वा वर्धापन दिन साजरा

कोल्हापूर, ता. ५ : जिल्हा प्रायव्हेट क्लासेस टीचर्स असोसिएशनचा २५ वा वर्धापन दिन आणि जिल्हा क्लास संचालकांचा महामेळावा इंजिनिअरिंग असोसिएशनच्या हॉलमध्ये झाला. माजी महापौर शोभा बोंद्रे यांच्या हस्ते क्लास संचालकांचा सत्कार झाला. महाराष्ट्रातील क्लास संचालकांची शिखर संस्थेचे संस्थापक अध्यक्ष प्रा. प्रवीणसिंह ठाकूर अध्यक्षस्थानी होते. शिक्षण महर्षी कर्मवीर भाऊराव पाटील जीवन गौरव पुरस्कार देऊन प्रभा पेठे, अनिल पाटील यांना गौरवले. प्रशांत कासार यांना करवीर संस्थापिका महाराणी ताराराणी पुरस्कार देऊन संघटनेतर्फे सत्कार केला.
जिल्ह्यातील १० वर्षांहून अधिक काळ क्लास घेणाऱ्या ४६ क्लास संचालकांना राजश्री शाहू पुरस्कार देऊन गौरवले. श्री. ठाकूर म्हणाले, संघटनेने समाजाचे ऋण न विसरता कित्येक समाजोपयोगी उपक्रम विद्यार्थी, समाजासाठी राबवले आहेत. संचालकांनी काळाची पावले ओळखून क्लासमध्ये बदल करणे गरजेचे आहे.
राज्य सरकारने क्लास नियंत्रण कायदा करण्यापूर्वी पीटीए या राज्य संघटनेचे दोन प्रतिनिधी कायदा समितीत घेऊन मागण्या ऐकूनच योग्य तो निर्णय घ्यावा, असा ठराव पास केला. संस्थापक अध्यक्ष श्री. कासार यांनी प्रास्ताविक केले. सौ. बोंद्रे, विकास काशीद, श्री. ठाकूर यांचा सत्कार संघटनेचे उपाध्यक्ष उत्तम मेथे यांनी सत्कार केला. संघटनेचे सचिव विवेक हिरवडेकर यांनी आभार मानले. शुभदा हिरेमठ यांनी सूत्रसंचालन केले. लकी ड्रॉ काढून भाग्यवान पाच क्लास संचालकांना गिफ्ट देण्यात आले. संजय यादव, अभिनव तेली, संजय दाभाडे, उत्तम साखरे, किरण पाटील, प्रदीप पाटील आदींनी परिश्रम घेतले.